Yangon khualipi Ah Khuabawi Pali Cu Ni Thum Chung Ah An Thah Hna:

 

Yangon Ah Khuabawi Pali Cu Ni Thum Chung Ah An Thah Hna: Yangon KaTuanTey, Mingalardone, Taungdagon, Kuanchankung le TharkeTa peng ah meithal kahnak a chuak i, ni thum chung ah khuabawi pali an thi. Inn-zaa uk pakhat le inn-hra uk pakhat hliamhma an pu, tiah tualchung mi hna nih an chim.TuanTey peng le Taungdagon peng ah aho si hngalh lomi nih August 1 ah TuanTey peng Bikhu khua i khuabawi a Tuan liomi Thein Win cu a kah thah. Taungdagon peng, No.25 sang ah inn-zaa uk Kyaw Ngaing zong hliamhma a pu.

 

Mingalardone peng Shwenanthar khua komh khuabawi Win Ngaing Htun le a nupi Hemar Lwin cu kah thah an tong. Kuanchankung peng Aungmingalar khua inn-hra uk Myo Min Khine zong kah thah a tong.TharkeTa peng No.6 sang ah aho si hngalh lomi nih nizan August 3 ah inn-hra uk Ngi Ngi Lwin cu a kah i hliamhma a pu, tiah sang mi hna nih an chim. A luancia July thla ahkhan Yangon khua chung ah bomb puahnak a chuak i, minung pahnih an rak thih pinah pakua hliamhma an pu.

 

Chin Ramkulh Paletwa Ah SAC Ralkap le AA Kahdohnak A Zual!: Chin ramkulh, Paletwa peng ah SAC ralkap le AA hna cu August 1 in 3 tiah pehtlai in an i kap, tiah theih a si. Paletwa khua thlanglei Kaladan tiva nichuah lei Na tlang lonh lam le Namata khua pawng ah kahdohnak a chuak i, Battalion 289 nih kahdohnak hmunhma cu hriamngan in an kah, tiah Paletwa ummi pakhat nih a chim. Kahdohnak ruangah SAC ralkap nih Kaladan tiva thluan a kalmi vokkuanglawng hna cu chekhlatnak an tuah hna, tiah theih a si.

 

August 2 ah Tungmawa khua siangsangrun ah sianginn a kaimi hna cu, vokkuanglawng i cit in an Tin lei ah SAC ralkap nih an kah hna caah kum 12 hrawng tang nga kaimi siangngakchia pa pahnih cu a hmun ah an thi. Siangngakchia pathum zong hliamhma an pu. Paletwa peng ah SAC ralkap nih a hlan lio tein ti lam le tlang lam an rak phih caah eidin phorhnak a har ngai. Atu lio zong ah kahdohnak a zual i, Paletwa khuami hna cu eidin le a dangdang thilri an har ngai, tiah theih a si.

Credit;The Chin Post