US Ah LaimiPu Bawi Cung Nung le a fapa nam in sawh tu Cu Kum 25 Thongdan An Pek:

 

US Ah Laimi Pafa Hna Nam In A Sawhtu Cu Kum 25 Thongdan An Pek: Kum 2020, March thla lio ah Laimi pafa hna nam in a sawhtu Jose Gomez III (kum 21) cu US biaceihzung nih August 4, cawn nili ah dantatnak an pekmi a thanh.Pu Bawi Cung Nung le a fale pahnih cu US ram Texas ramkulh Midland khua, Sam’s Club dawr i an kal lio ah Spanish pa Jose Gomez nih nam in a rak sawhmi hna an si. Jose Gomez nih cun Covid zawtnak a chuahtertu Tuluk miphun ah ka ruah hna caah ka sawhmi hna a si, tiah biaceihzung ah a chim.

 

Hi caan hi Covid zawtnak a chuahka a si caah Asian mi le a bik in Tuluk miphun cu huat le ral an ton tuk lio a si. Cucaah Pu Bawi Cung le a fapa zong hi sualnak le palhnak zeihmanh an ngei lo nain namsawh tiang an tuarnak a si.Pu Bawi Cung Nung le a fapa nam in sawh an ton hi 2020, March 14, zanlei 7:32pm ah a si. Nam sawh an ton lecangka in an pawngkam ummi Mirang pa nih a zuanhnawh hna i amah zong hliam a tuar. An pafa in an hmai ah a sawh hna i a fapa Robert hi fak tuk in a hliamh. An pahnih in siizung ah an tlikpi colh hna. Ni zeimawzat siizung an um hnuah dam tein an chuak ṭhan.

 

A sawhtu Jose Gomez hi a sawh hna lio ah kum 19 a si, kumhnih a rauh hnuah biaceihzung nih kum 25 thongdan an pek hi a si. Pu Bawi Cung Nung hi Midland Chin Immanuel Baptist Church chungtel a si i, Kum 2014 ah US a phanmi an si. Pathian a duh ngaimi a si, tiah theih a si. Laitlang lei a khua cu Thantlang peng Thau khua a si nain Kalaymyo ah a ummi an si.

Relchap,Vanlawng Kahnak He CDM Nan Tuah Ahcun Laksawng Phaisa Kan In Pek Hna Lai – NUG: National Unity Government(NUG), runvennak zung nih Vanlawng thlak khawhnak hriamnam he CDM nan tuah ahcun laksawng phaisa kan pek hna lai, tiah cathanh a chuah.

 

SAC ralkap nih vanlawng in PDF le tualchung mi a kah lengmang hna caah Vanlawng thlak khawhnak hriamnam he mizapi sinah nan i fonh ahcun laksawng phaisa kan in pek hna lai, tiah runvennak zung nih an langhter.Ramchung kahdohnak, a bik in Sagaing ramthen, Magway ramthen, Karen ramkulh, Chin ramkulh le Karenni ramkulh ah vanlawng in SAC ralkap nih a kah hna caah tualchung mi a thimi le inn le lo a rawkmi a tam cang.

 

A luancia thla ah vanlawng i khamnak motor(Armour) le a dang raltuknak thilri he CDM nan tuah ahcun laksawng phaisa kan pek hna lai, tiah NUG nih a rak thanh ahkhan pehtlaihnak a kan tuahtu an um, tiah runvennak zung in chungtel Naing Htu Aung nih a chim. Nawlngeihnak lak hnuin SAC ralkap le palik CDM a tuahmi hi thong hra leng an phan cang, tiah theih a si

Relchap, Innsein Peng NLD Chungtuan Pa Inn Ah SAC Ralkap Nih Sing 700 Man Thilri An Firpiak!: Yangon ramthen, Insein peng Sinngu sang ah a ummi NLD party chungtel sang chungtuan a simi, Hla Phe, a nupi le a fapa nupi cu August 4 ah SAC ralkap nih an tlaih hna pinah sui le ngun telh in Ks. sing 700 man thilri an firpiak hna, tiah tualchung mi hna nih an chim.

“August 4 chun hnu sml 1:30 hrawng ah an tlaih hna i, Hla Phe inn ah SAC ralkap cu motor 6 hrawng in an ra i, an tlaih. Inn chung a ummi facang, cite, sui le ngun hna cu an fir dih. An inn zong an hrenhkanh hna,” tiah tualchung mi pakhat nih a chim.

Mandalay ramthen, Sinku peng ah July 30 zanlei ahkhan sehzung uktu thawng peknak in CDM zung 24 tlaih an rak tong. Cu sehzung ah cun CDM 75 an um i, an tlaih hna thawng an theih in a dang cu an zaam dih. Tlaih a tongmi hna cu SAC ralkap nih sing 10 cung nan kan pek ahcun kan in thlah hna lai tiah an hro hna, tiah theih a si.

“An tlaihmi hna hi pa 13 le nu 11 an si. Thawngpetu nih a chimh hna caah tlaih an ton hi a si. An tlaihmi hna cu minung pakhat ah a tlawm bik phaisa sing 10 in rak tlanh dingin SAC ralkap nih an ti hna. Voidang zong ah tualchung mi an tlaih hna i, tangka in an tlanh ter hna,” tiah PDF pakhat nih a chim.

Credit;The Chin Post