Tutan Timit Operations ah ralhrang lei hi tlawmte lawng an tang ko cang (an meithal puah thawng in hngalh asi ,

 

July 30 in Timit kahdohnak (Timit Operation) cu thawk a si i nihin August 21 (Ni 22 ) chung ah SAC ralkap 50 leng an thi cang. Nikhua a chia peng i chum a zaam tuk caah hliam a tuar mi zat cu kan confirm kho lo, a thimi kan confirm khawh mi hi 50 leng an si, tiah CNA chimphuannak nawlngeitu Salai Htet Ni nih The Chin Post ah a chim.

 

”Kan ralkap hna nihcun kuan khat ah ral pakhat tiin kuan hi semrel tein an hman, kan ralkap hna umnak hi ralhrang hna an umnak hmun nak in a san deuh caah Sniper in an bawh peng hna i a chuak chom in, Sniper cun an kah hna, a chel caan ah an hnu lei in kan ralkap nih an va hel hna i an va kah caan zong a um țheo.

 

 


“Tutan Timit Operations ah ralhrang lei hi tlawmte lawng an tang ko cang (an meithal puah thawng in hngalh asi ko). Asinain Hakha he ai naihnak te a si tik ah Hakha in Timit lei an kal an kir a tam i ai chawk bon maw an si,a thar dah? timi hi hngalh khawh a si lo caah Hakha Rungtlang ah ralhrang thazaang zeizat hrawng an um ti balte hngalh a har,” tiah kahdohnak kong he pehtlai in a chim chih.

Timit Operations cu ni 22 a rau cang i SAC ralkap 50 an thi cang ai hliam mi zong an um len. Chin ralkap in hliamhme a tuar mi tlawmpal an um nain atu tiang an nunnak a him rih.

 

Relchap,Chin ramkulh, Mindat ah SAC ralkap nih Mindat-Pakokko lam Shwe Ngyaung Aye minung phortu khualtlawng motor pakhat cu a chung cuangmi minung he August 17 ah an rak tlaih hna i, nihin August 21 tiang ah an thlah rih hna lo, tiah tualchung mi nih an chim.

Cu khualtlawng motor cu an tlaih hnu ah motor khaltu le a zultu cu an thlah than hna nain, motor chung cuang khualtlawng mi hna cu ni 5 a rauh tiang ah thlah rih lo in, Mindat khuachung SAC 274 battalion ah an hren hna, tiah theih a si.

SAC ralkap nih khualtlawng motor pakhat ah khualtlawng mi minung 7 an tlin lawng ah motor chuahnak nawl an pek hna i, SAC nih rikhiahnak an tuahmi zat minung an tlin lo a si ahcun Mindat in motor chuahnak nawl an pe hna lo, tiah theih a si. Cu pin ah Tualchung hriamtlai phu CDF-Mindat hna cu SAC ralkap nih an sin ah lut ding in atu le tu an lem hna, tiah theih a si.

“SAC ralkap nih khualtlawng motor an tlaih mi ah cun minung zeizat dah tlaih an ton fiang tein theih a si rih lo. Motor khaltu zong nih thil sining a chim duh lo. Mindat um SAC ralkap nih CDF hna cu anmah lei ah tang ding in an lemsoi hna,” tiah khuami pakhat nih a chim. SAC ralkap tuahsernak ruang ah Mindat in hmundang ah a zaam mi minung 9500 hrawng cu kum khat leng a rauh tiang anmah umnak hmunhma ah an k