Thong inn in a zaammi hna cu dohthlennak a tuahtu ralkap chungtel 2 le ramkhel lei sualphawtnak in tlaih a tong mi 3 an si.

Magway ramthen, Pakokko pengkomh thonginn in a zaam mi ramkhel lei thongtlami 5 cu tualchung hriamtlai phu nih an chanhchuah hna i, a himnak ah chiah an si cang, tiah Young Force (UG) nih an thanh.

 

 

Pakokko pengkomh thong inn in a zaammi hna cu dohthlennak a tuahtu ralkap chungtel 2 le ramkhel lei sualphawtnak in tlaih a tong mi 3 an si. September 10 ah khan chanhchuah an si i, a himnak hmun ah kalter an si cang, tiah theih a si.

 

Ramkhel lei thongtla minung 5 hna cu anmah te timhtuahnak in a zaammi an si i, Pakokko peng tualchung hriamtlai phu pah-kah-phah le Local PDF a si mi Pakokko peng tualchung hriamtlai phu PPDF, Young Force (UG), Pakokko pah-kah-phah phuhnih fonh, Pakokko Ranger, RSO(PKU) le tualchung hriamtlai phu dang hna he i bawm in thongtla a zaam mi pawl cu an va an bawmh hna, tiah theih a si.

 

Magway Ramthen, Yaw Hmunram PDF Sakhan Pakhat Cu SAC Ralkap Nih An Khangh! : “Hriamnam thazaang aa thlau tuk caah kan sakhan pakhat cu SAC ralkap pawl nih an kan hrawhpiak,” tiah Magway ramthen, Yaw hrambunh The Youth Force (Saw&Kyaukhtu) nih nihin September 11 ah cathanh an chuah.

 

“Nizaan September 10 ah tat-mah 77 in minung thazaang 90 he rallam sialtu SAC ralkap hna cu TYF hmunram chung ah an lut i, Kyaukhtu hrambunh in hriamngan an thlah, hmaitonh i kahdoh ding ah kan thazaang aa thlau tuk caah kan sakhan cu kan chuahtak,” tiah TYF in tuanvo ngeitu nih a chim.

 

TYF phu hna cu an him dih nain, an kaltakmi sakhan le thlam hna cu SAC ralkap nih an khangh dih. Cun, cu sakhan pawng ah a ummi tualchung mi hna thlaam le leeng zong an khangh dih hna, tiah TYF nih an langhter.
Credit;The Chin Post