Thla Nga Chung Ah Bomb Phummi Ruangah Tualchungmi 162 Nunnak A Liam,

August 2022: 2022, January thla in May thla dih tiang (thla nga chung) ah vawlei tang phummi bomb ruang le SAC ralkap nih an thlau takmi bomb puahsualnak ruang ah ramchung huap in tualchung mi 162 an nunnak a liam cang, tiah United Nation’s Office for the Coordination of Humanitarian Affairs(UNOCHA) nih August 10, zinglei ah cathanh an chuah.

 

Rakhine ramkulh chung Arakan Army(AA) le SAC ralkap kar i hnorsuannak zong a san chin caah thinphang ngai a si. Vawlei phummi bomb hna le SAC ralkap nih an thlaumi bomb puahkehnak zong cuhlan nakin a tam deuh kho, tiah an langhter,Cucaah UNOCHA le anmah he pehtlaihnak a ngeimi phu hna nih Rakhine ramkulh chung ah mah umnak kaltak in ralzaam dirhmun a phanmi hna sin ah bomb kong he pehtlai in fimchimhnak an tuah, tiah an thanhmi ah an langhter.

 

Bawmhchanhnak fak ngai in phihkhamnak a um buin minung hawi cung zawnruahnak he bawmhnak a petu, ramchung ramleng phu hna nih 2022 kum cheu chung ah minung nuai 3 leng ca ah bawmhnak an pek, tiah UNOCHA nih cun an langhter fawn, UN nih a hnu bik cazin a langhternak August 1 tiang ah khan, ramkulh le ramThen hmunkip ah tlangcung hriamtlai phu hna le SAC ralkap kar kahdohnak a fah chin caah mah umnak hmun kaltak in ralzaam dirhmun a phanmi nuai 1.2(nuaikhat singhnih) an si, tiah a langhter.

 

SAC Ralkap Le KNDF Battalion 9 Kar Kahdohnak Ah SAC Ralkap 15 Hrawng An Thi!: Demoso pengchung um SAC ralkap hna sin ah riahcaw chanh ding in a kalmi SAC ralkap le KNDF battalion 9 hna cu ni 10 chung pehtlai in an i kap, tiah theih a si. August 1 in August 10 tiang kahdohnak chung ah SAC ralkap nih thazaang tam ngai an chap caah kaphnih kar kahdohnak a fak ngai, tiah KNDF Battalion 9 nih nihin August 10 ah cathanh an chuah.

SAC ralkap nih van lei le vawlei lei in kahdohnak an tuah nain mizapi nih hlutmi hriam hna he Tha tein kan kham khawh hna. SAC ralkap 15 nak tlawmlo an thi i, hliamhma tuar an tam. KNDF B-9 in ralkap 3 hliamhma an tuar nain an hliamhma kong ah thinphan ding a um lo. Hmunhma thianhhlimhnak kan tuah lio ah SAC ralkap hriam zeimawzat kan lak, tiah KNDF nih cun an langhter.
Credit;TheChin Post