Sri Lanka President Cu A Inn In Mipi Nih An Dawi Hnu Ah A Rian A Dinhtak!

Sri Lanka President Cu A Inn In Mipi Nih An Dawi Hnu Ah A Rian A Dinhtak!: Rampi chawlehthalnak lei ah buainak a tong cuahmah mi Sri Lanka President cu nizan zarhte ni ahkhan Sri Lanka mipi nih an umnak inn ah luhhnawh in an dawi caah a zaam i, president inn a chuahtak suimilam tlawmpal ah President rian in aa phuahnak kong media ah a thanh

 

Mibu thong tampi hna nih cun Sri Lanka khualipi Colombo ah president umnak inn cu chuahhnawh in, cozah lutlaitu president cu ramchung chawlehthalnak(economy) sunghzawtlaknak kong i mawhphortu ah an puh i, duhlonak langhter in a inn ah an luhhnawh. Mibupi nih president inn kulhnak hna cu an baoh i, tiliaunak(swiming pool) le innkhan kip i, an luh lio hna cu media ah hmuh ding in cheukhat nih live an thlah i, president inn cu an sawksam.

 

Mipi nih president inn a luhhnawh lio ahhin tilei ralkap navy hna nih president cu an hruai i, Sri Lanka thlanglei tipi ah an zaampi. Hi an zaampinak hmun hin an rian a dinhtak kong President Rajapaksa nih cun a thanh. Buainak a chuah lio ah hin buainak a linhsat tuk caah President chuahpi ding in amah vengtu ralkap hna nih mibupi thawlnak ah meithal zong an puah. Colombo khuapi buainak ruangah siizung a phan mi zeimawzat an um nain nunnak a liam mi an um theih a si rih lo.

 

Sri Lanka hi ramchung chawlehthalnak a tumchuk tuk caah tukum hramthok khan buainak tampi an rak tong i, cozah lutlai zeimawzat hna zong nih an rian an rak dinhtak. Ramchung ah eidin tirawl a har i, oil man a fah tuk tikah mipi nih celh ti loin President cu buainak vialte mawhphortu ah puh in an luhhnawh nak hi a si.

Credit; The Chin Post