South Korea Nih US Missile A ram Ah A Bunhmi Cu China Nih A Duh Lo!

US sermi ralvennak Missile system cu South Korea nih a ramchung i a bunh ruang ah China nih a dohkalh. Terminal High Altitude Area Defence (THAAD) Missile system kan bunhnak a ruang cu kan ram venhimnak ah kan bunhmi lawng a si, tiah South Korea President Office in chimphuannak nawlngeitu nih cun a chim.

 

China nih cun THAAD Missile System an bunhmi nih hin kan ramchung thil sining an rak hlathlai khawh, tiah a chim ve. 2016 in South Korea nih Missile System bunh aa timhnak kong a rak thanh hnu in, China nih ramhnih kar chawhlehnak a rak phih ve,THAAD Missile System kan bunhnak a ruang cu North Korea Missile in kan i ven khawh nakding ca lawng ah kan bunhmi a si, tiah South Korea President nih cun a chim.

 

 

Relchap,Magwayramthen, Saitpyu peng, Paikyay khua ah, August 9 ahkhan rallam a sialtu SAC ralkap nih Paikyay khua ummi Ma Hnin Wai cu an tlaihhrem i a thah hnu ah, a ruak cu lamkam ah an hlonhtak, tiah Ma Hnin Wai a vapa nih a chim.

Magway ramthen, Saitphyu peng ah ralzaam dirhmun in a ummi Ma Hnin Wai le a vapa cu khuachung ah vok rawl pek ding ah an kal, August 9 ah rallam sialtu SAC ralkap 5 he i tong in tlaih an timh hna caah an zaam i, Ma Hnin Wai cu SAC ralkap nih an tlaih. A thaizing ah SAC ralkap nih Ma Hnin Wai cu an tlaihhrem i, an thah beh, tiah theih a si.

“Ka nupi cu a ruak kan hmuh ah angki loin a um, an tlaihhrem hnu ah an thah beh, a kut khat lei a kiak i, a baan ah mei hma zong a um. An thah hnu ah a ruak hi lamkam ah hlonh dawh a si. Atu bantuk thah sawh siloin an hrem hnu ah an tlaihhrem i, an thah beh mi hi cu ka lung a fak tuk hringhrin,” tiah a vapa nih a chim. Ma Hnin Wai nih cun a vapa, fapa pakhat le fanu pakhat a taan tak hna.

SAC ralkap nih Ma Hnin Wai cu an tlaih i, tlaihhrem lengah thirthul linh in a ke le a ban ah an duah, a ban an merhnak ah a kut khatlei a kiak, a hngawng zong ah hliamhma hmuh a si, tiah nitlak lei brigade 7, battalion 702 PPC in tuanvo ngeitu pakhat nih a chim.
Credit;The Chin Post