Sihni ṭha pakhat si ka duh ko nain hramhram uknak ka cohlan khawh lo caah hriamtlaih dothlennak hi ka thim” CNF nu ralkap Daisy

Sihni ṭha pakhat si ka duh ko nain hramhram uknak ka cohlan khawh lo caah hriamtlaih dothlennak hi ka thim” CNF nu ralkap Daisy The Chinland Post | 2022 June 7 – 2021 February 1 in ralkap nih hramhram in uknak a lak hnu ah hramhram uknak a cohlang kho lomi mino cheukhat hna cu hriamtlaih dothlennak kha i thim a si.

Cu mino chungah Chin mino Mai Daisy zong aa tel ve. Mai Daisy cu Magway University in Law Degree a ngahmi a si. Atu lioah, Chin National Front (CNF) Headquarter, Victoria camp ah raltuknak lei rian a ṭuan liomi a si. Chin mino nu pakhat nih zeiruangdah hriamtlaih lam hi aa thimnak a ruang a si? A hmailei a chunmang zeipawl dah a si? timi kong Khonumthung Burmese he biaruahnak an ngeihmi The Chinland Post nih a tlakning in Laica in leh chinmi a si.

Khonumthung Brumese : Zeiruangdah hriamtlaih dothlennak lam hi na thimnak a ruang a si?

Mai Daisy : Hriamtlaih dothlennak ka thimnak a ruang hi hramhram uknak ka duh lo ruangah a si ko. Hramhram uknak phung tangah caan sautuk kan rak um cang caah a bik in tlangcung miphun hna nih fimnak, zatlang nun le chawleh lei a zapi in kan ṭhangcho kho lo. Cucaah hi hramhram uknak hi kan doh lo a si ahcun a dohtu ding an um ti lai lo. Mino hna nih kan i ṭhangh caan a phan cang timi ruahnak he CNF ka luhnak a ruang hi a si.

Khonumthung Brumese : Hriamtlaihnak lam an phaktertu a ruang bik hi zeidah a si?

Mai Daisy : Hriam kan tlaih hlan ah dai tein duhlonak rak langhter a si. Asinain, SAC lei nih hriam an rak i tlaih hmasa. Mipi hna phungning loin an kan tlaih. Mino tampi tlaih an si. Ka theihmi ka hawile zong an i tel. Cucaah, hriam telh loin donthlennak ka tuah rih a si ahcun a si kho ti lo. Kanmah lei in sunghnak tamtuk kan ton cang caah, anmah nih hriam an i tlaih ve caah, hriam kan i tlaih ve a hau cang timi lungthlehnak he hriam ka tlaih hi a si.

Khonumthung Brumese : Nu pakhat na si tikah hriamtlaih dothlennak ahhin zeibantuk harnak dah na ton? Cu harnak cu zeitindah na tei khawh?

Mai Daisy : Nu pakhat ka si caah harnak cu a tampi ko. A hmasa bik ah thinlung lei timhtuahnak kan ngeih hmasa a hau. Zeiruang ah kan ti a si ahcun hi bantuk hi kan mang hmanh ah kan manh bal lo. Nikhat khat ah hriam kan tlai te lai timi mang zong kan manh bal lo. Asinain, atu caan cu hriamtlaih a haumi dirhmun a si caah kan thinlung kha kan i sersiam hmasa a hau. Ka tuah kho tak lai maw timi kha kan ruah hmasa a hau.

Asinain hriamtlaih ding in thazang a kan petu bik cu Injustice hi a si. Mah Injustice pi hi kan zoh sawhsawh kho lo. Cucaah harnak pawl cu kan ruahcia a si ko. CNF kan rak luh tikah a chiabik a phichuak cohlan khawhnak timhtuahnak he kan ratmi a si tikah pa pawl he raltuk nan cawngṭi lai ti a si tikah a tampi har lai timi cu theih a si ko. Kan tuah khawh ruangah ti si loin kan tuah hrimhrim a herh timi thinlung he a har tuk ko nain kan kai hi a si. Cu chungah taksa lei, thinlung lei harnak tampi ton a si ko nain a ṭha bik zuamnak he cawnnnak a dongh tiang ka kai hi a si.

Khonumthung Brumese : Dothlennak chungah zeibantuk pekchannak dah na ton?

Mai Daisy : Pek channak kan ti a si ahcun, kan dawtmi hna he i ṭhen hi a si. Kan dawtmi kan chungkhar, kan unau pawl le kan dawtmi hna he nuam tein kan um ding caan khi a si. Asinain, hramhram in uknak lak a si hnu ah dothlennak tuah a hauh tikah kan dawtmi hna he i hlat a si. Kan rian le zeizong vialte kaltak dih a si.

Khonumthung Brumese : Dothlennak he pehtlai in na zumhmi, na ruahchanmi pawl na ka chim kho hnga ma?

Mai Daisy : Dothlennak he pehtlai in ka zumhmi cu dothlennak hi kan tei ko lai sihmanhsehlaw a caan a rau rih lai. Cucaah kan dothlennak hi kan tei hrimhrim a hau. Kan hmai ah nunnak a pemi kan hawile an tamtuk cang. Mipi nunnak, inn le lo zong tamtuk sungh a si cang. Cucaah dohthlennak kan tei hrimhrim a hau.

Teinak kan hmuh khawhnak ding caah zuamnak thinlung kan herh. Intuar khawhnak kan ngeih a herh. Pakhat le pakhat daw deuh le lungrual deuh tein kan um a herh. A tulio caan ah a kan ṭhentu thil tampi a raa lai. Cu chungah pial loin kan i tinhmi zeidah a si kha philh lo tein hi dothlennak a dongh tiang kan tei lai tiah zumhnak ka ngei.

Khonumthung Brumese : Dothlennak chungah a fak tukmi sunghnak hi zeidah na si hnga?

Mai Daisy : A fak bik sunghnak cu dawtmi hna he i hlat hi a si. Hika hmun kan rat tikah a fiangmi cu kan nunak tiang kan pek lai timi kha theih cia a si. Kan chim a si ahcun, kan miphun, kan hmunhma caah kan i pekchanh lo a si ahcun ngaihchihnak he kan um peng te lai.

Ṭhanchonak a lam tampi kan ngei ko. A tulio caah ahhin, ramdang ah sianginn kan kai kho. Asinain, kan dihlak in randang ah sianginn kan kai a si ahcun a honih dah a doh lai timi thinlung he hika hmun kan rat hramthok liote in kanmah miaknak thlah dih ding in kan raa, kan nunnak zong kan pek colh khawhmi a si. Cubantuk lungthlehnak fak kan ngeih hnu ah kan rat hi a si.

Khonumthung Brumese : Dothlennak chung na luh hlan ah na si duhmi nunning hi zeibantuk dah a si?

Mai Daisy : Law a kaimi ka si caah sihni ṭha pakhat cu si ka duh. Law ka kaika tein timhmi ka rak ngei cang. Kan Chinram ah fimnak zong a niam. Ramdang ah sianginn kai a hau. Cu ramdang sianginn kai chungah hartak tamtuk ton a si. Holh thok in thleidannak tampi ton a si.

Cun, Law ṭha tein a thiammi hi kanmah lei ah kan tlawm tuk. Law he a paw aa cawmmi an har tuk i kan ram caah khoika in dah ka tel khawh lai i zeitindah ka tel lai timi ruahnak he sianginn a dongh tiang ka kai nak hi a si. Cucaah ka ruahchannak a ngan bik cu kan ram a ṭhat a si ahcun kan hmunhma ah tuahding a tamtuk timi ka hmuh caah kan ram hei ṭha sehlaw Plan tampi ka ngei ko tiah chim ka duh.

Khonumthung Brumese : Na duhmi chungmang le a tak nunnak aa dan tikah zeitindah na lungum?

Mai Daisy : A caancaan ahcun, ruahchannak a tlau tawn. Kan chunmang le a tak nunnak aa dantuk tikah ruahchannak a tlau i lung zong a dong tawn. Asinain, kan lung dongh a ngah lo. Kan tuah ding rian a tamtuk rih. Harnak kan ton hmasa lawngah nuamhnak kan coding a si caah a tu kan dirnak ah ka tuah kho lo, a si kho lo tiah lung zor loin mah hi zeitindah kan tawlrel lai? Zeitindah a ṭha deuh in kan tuah khawh lai timi thinlung le hmai kan kal rih a si ahcun nikhat khat ah teinak kan hmu te lai tiah zumhnak ka ngei. Khonumthung Brumese : Dothlennak kan tei a si ahcun hriamtlaihnak lam maw na thim beh lai asiloah zeibantuk plan dah na ngeih?

Mai Daisy : A dik tein kan chim a si ahcun hriamtlaih lam hi cu ka uar lo. Thichuahnak pawl hna hi ka duh lo. Asinain, hriamtlaih a haumi dirhmun a si caah hriam kan tlaih hi a si. Dothlennak kan tei a si ahcun lamdang tein ka teltum ko lai. Asinain, hriamtlaihnak lam hi cu ka lungsi tuk lo tiah chim ka duh.

Khonumthung Brumese : Mipi sin ah chim na duhmi a um ah maw?

Mai Daisy : Dothlennak hi hriamtlaihnak lam lawng in tuah a si lo. A phun tamtuk a um. Cheukhat nih bawmhnak, cheukhat nih thazang in tuah a si caah lawmhnak tampi ka ngei tiah chim ka duh. Cucaah kan lungzor hlah u sih! Kannih zong a chia bik dirhmun a tongmi kan si caah kan zapi kuttlai in Democracy rampi serṭi hna u sih! Upa nih an tuah khawh ti lomi kha mino nih pehzulh in ṭuan hna u sih! Teinak he kan i hlat tuk ti lo.Credit – The Chinland Post, Edit – Hmanthlak hi midang asi.

Ram Lawng” a si. Pu Chawn Kio nih cun, “Vawlei serka in ahohmanh um lonak ram, minung nehnang ngei lo ram,” a si ti. Cu ram le hmun ah mahte khuakhan lairelnak nawlngei in kan i uk, aho miphun kut tang hmanh ah kan um bal lo. Leido ral cu a rak tho sawk, miphun phun khat in kan rak um kho fom lo! Miphun dang nih pen le uk kan duh lo ruangah Tuluk ram chuahtak in atu Chinram hi kan tlak.

Culio zong ah miphun dang nih uk le pen a um lo, a duh zong kan duh hlei lo. 1890 miraang ralkap zarual Hakha an phak tikah a pachuak in miraang doh awh ah an chuak i an rak doh. Hriam le naam ai thlau tuk, hriamtlai minung ah an i thlau tuk ko sinain an rak tei hna lo, a dongh mawrawt ah a rem in an rem hna.

Miraang ralbawi Gen. George White bang nih cun, “Ral ka tuk mi vialte lakah a thawng bik le tei har bik mi nan si,” a rak kan ti phah. Kan rak hman peng mi le ngeih peng mi mahte khuakhan lairelnak, nawlngeihnak, zalonnak, kan nunphung le kan caholh vialte miphun dang nih tlaihhip in hrawh, thencheu lai kan phan caah a man a fak tuk mi “dohthlennak” kan rak i thim kha si.

1890 hlan kha kanmah khua le ram cio ah ramuk bawi le khuabawi hruainak in kan i hruai. Miraang an kai hnu,1896 kum thawk in aanpei (British) rual nih a kan pen i cuticun miphun dang uknak tang ah kan tla lan. Kawlram pumpi dihlak kum 124 a pen hnu, 4 January 1948 ah “Zalonnak-Independence” a kan pek. Kan zalen cang lai kan ti lio ah, 12 February 1947 ni i miphun phun (4) fonh nih biahrennak catlap cung minthut vialte U Ne Win nih a hrawh riangmang i nihin tiang kan chaak a kan barh hi a si.

Union (Panglong Agreement) dirhnak hrampi hnatlak ningin ram ai hruai khawh lo tikah tlangcung miphun hriamtlaih in dohthlennak tuah kan i domh. Miphun dang cu um rih seh, kanmah miphun zong, 1961 ah Pu Hrang Nawl hruainak in Chin Liberation Army (CLA) ti’n kan i thawk i 1988 ah Chin National Army/Front (CNF/A), tiah nihin tiang ralhrang kan doh lan. Nihin Pauchuah Dohthlennak (Spring Revolution) ah cun Chinland Defense Forces (CDF) tiang tho in ramchung ralhrang kan doh cang. Kawlram tuanbia ah a um bal lo mi ramchung ralhran chan kan phan.

Kan mawh loh! Ralhrang uk-pennak doh in kum 70 lengkai ramchung ralthawh a si tikah, vawlei cung Civil War sau bik tuanbia tialtu a si. 1948, British pennak chung in luatnak kan hmuh hnu ah linsa ngai in dohthlennak voi thum (a tlangpi in) a cang. Cu hna cu – 8888 Revolution, Saffron Revolution le Spring Revolution an si. Nihin kan dohthlennak hi a voithumnak (Spring Revolution) a si i voidang nakin a linsa khun, ram mi lungrual in kan tang khun. Voidang dohthlennak cu kan chuah kho lo, kan lim kho lo.

Tutan cu kan chuah lai. Khahlan dohthlennak ah a luang mi thisen, nihin a luang mi thisen vialte “man kan ngeihter lai.” “Hi ramchung ralhran kum 70 lengkai chung ah tutan Spring Revolution hi a fak bik a si ko lai, tiah ka ruah. Uknak lak (control power) 1st February 2021 in CDM (Civil Disobedience Movement) ai peh i hriamtlaih nih a zulh. Hriamtlaih in ramchung ralthawh a fah tikah ramchung khuapi in khuate ah, khuate in ramtang le ramdang ah dornak hmun kan khuar. UNHCR nih May 4 a thanh ning ah, “

Ramkomh Kawlram buaibainak ruangah India phan mi dihlak hi 39,150 an si; Cu chung ah, a tlawm bik 3,197 hi Delhi hrambunh UNHCR panh in Ralzam (refugee sinak) an hal, Ralzam tam deuh zatuak 65 (%) tluk hi Mizoram i khuate ah siseh, chungkhat sin ah siseh, hawikom sin ah an um i, a dang zatuak 35 (%) tluk hi khuami le cozah nih bawmhnak in ser mi ralzam dornak hmun ah an um.

Nihin tiang ah Ramkomh Kawlram pumpi ahhin, Ralzam 937,000 tluk um a si cang i, cuchung ah 590,000 hi February 1 Ralkap nih hramhram nawlngeihnak lak hnu in a zaam mi an si. Cun, 59,000 tluk hi Innpa ram a simi Thailand le India ah a zaam mi an si, tiah UNHCR nih cun a langhter (The Chinland Post tial mi).

Nun himnak kawl in tlikzam a hauh tikah, zuatkhalh tilva in inn le lo tiang kaltak a hau. Misual rual nih kan zeihmanh nganh an tim lo, kan ngeihchun vialte chuh le lak dih an zalh. Nihin dohthlennak ah inn le lo khangh le hrawh a cannak ah States 10 le adang (region) a si i fakkhun tuar hi Sagaing, Magwe, Chin le Kayah ah a si bik. 1st February 2021 thawk in 30th April 2022 chung ah an khangh mi report The Irrawaddy nih hitihin a taar: Sagaing -7,503, Magwe-2,131, Chin State-1,147 le Kayah-407, an si ti.

Data for Myanmar nih “April thla dongh tiang ah inn 11,417 khangh a si cang, tiah a thanh. Hi ahhin naihrawng May thla chung Falam peng uhkanghnak aa tel rih lo. CDM thawkka in minung 1835 leng thisen luang in an thi cang. Kanmah Chinmi thisa tampi ram le miphun kilvennak ah thisen a luang ve. Hi dohthlennak zoh tikah Chin State hi a temtuar bik kan si bantukin miphun ralkap nih venhim (control) bik a si ve. Phundang in kan chim ahcun, mahte khuakhan lairelnak tang ah kan um cang. Kan inn le lo cu an ciam, laitlai kan unau thisen a luang, sinain ralhrang nawlngeihnak a tlaunak ram ah cang.

Vawlei cung tuanbia cuan tuah usih, zalonnak ram an phak khawh nakhnga, thisen tampi a luang, nunnak tampi a liam, ngeihchiah tampi a dih, zawttlak tampi an tuar. Cubantuk thiamthiam in Za-uk phung (democracy) hmuh khawh nakding zong ah man tampi pek a hau. US ram mizapi nih zalennak an kawl lio 620,000 nunnak liam ko; Vietnam War (1965–1974) ah 1,353,000 liam; Great world War (WWI) ah minung 40 million leng le Second World War (WWII) ah 60 million leng nunnak liam.

Adang tampi zalennak ca, ram le miphun zawnruahnak nih a chuahpi mi dohthlennak ruangah nunnak liam a um lengluang lai. Hi vialte nunnak a liam le zawttlak a chuah cu “thisen pek awk a phu mi zalennak man a fah caah si.” Pathian bia nih, “Thisen luang loin tlanhnak a um kho lo,” a ti bantuk kha si. Zalennak le luatnak hmuh nakding ah thisen a luan i temtuarnak iin a hau. Cucaah nihin ralhrang doh awk hriam kan tlaih tikah, kan miphun le ram ca’h nunnak pek lam kan i thim a si. Kan pale (CNF/A) nih kum 34 chung dohthlennak ah minung 200 fai nih nunnak an pek cang.

Chinland Defense Forces (CDF) zarual zong nih an pek. Zalennak cu a man fak, man lo (free) in hmuh khawh a si lo cu ta, peknak tampi he hmuh mi a si. An thisen hi a thlawn a si lai lo, zalennak lam, luatnak ram chung ah kar a kan hlanpitu an si. Anmah ruangah nikhat hnu nikhat kan thang, nikhat hnu nikhat thazaang le ngeihchiah a thang; anmah ruangah thinlung a thawng, kan ral a tha. Kannih Laimi cu miphun phuhlam hmang kan si bantukin kan miphun le ram ca ah thisen a pe mi thisen nih a let in thazaang chuah a hau ti’n rian a kan khinh caah kan luatnak hram zong a si lai.

Kan domh cia hmabaan hi maaktak awk a tha lo mi, ngol duak awk a tha lo mi rian ngan a si. Khahlan dohthlennak cu pangpar bantuk a si (a fawinak cun), a caan lio lawng ah a linsa i caan sin ah a uai than. 1962, U Ne Win nih rampi uknak a lak thawk in hriamtlai nih an doh ko hna, sinain tutan Spring Revolution dohthlennak bantuk thil a chuak bal lo, cucaah Spring Revolution hi miphun dohthlennak aa thawknak ti khawh si. Ramchung ramleng in kan chuak, kan taangrual. Kan miphun temtuarnak a sau cang caah si

Cucaah a ngol kho ding kan si lo. Anmah ralhrang nih pen le uk ruangah laitlai nu le pa nunnak zeizat maw liam, an thilri phorhpiak duh lo ruangah minung zeizat dah tukhrem tuar, an uknak chiatkhaat ruangah nungna in chungkhar zeizat dah ai then cang, an uknak chiatkhaat ruangah zeitluk sifak le harsa dah kan si (vawlei cung ah sifaak bik ram ah kan i chuah), an uknak that lo ruangah mihawi phan lo in fimcawnnak ah zeitluk niam dah kan si? Nihin kan dirhmun bang cun pawcawm kawlhawlnak (tlanglo le leileh tuah) khawh zong si hlah, kan nun himnak kawl in tlik le zam kan hau.

Fimcawnnak kong ti ah le kumpi kum 3 chung ti-awk ngacha cawnnak reprai a um kho ti lo. Kan fanu kan fapa tampi fimcawnnak baangbat in an um i cheukhat cu nungak tlangval kumkhua nih a phak hna tikah ai ngol thai ding dirhmun an si. Cheukhat hoi cu ram le miphun kilven ruah ah fim cawng lio mi mino tampi nunnak liam. Taksa in kan temtuarnak, thinlung in kan temtuarnak, cawnnak le hngalhtheihnak ah kan hnut le taamhal in a kan chiahnak hmanh hi kum zeizat remruam rau in dah kan remh khawh te hnga mu? Cucaah kan dohthlennak hi lungdongh in ngol awk a tha hrimhrim lo, kan thisen a luang mi, uhkanghnak kan ton mi le zawttlak kan ton mi vialte liamter sawh ding cu a si kho hrim lo, chuak-lak in dohthlen a phu hrim ko.

A poi tuk mi tu cu, Laimi hi thil i neek kan i fawih tuk. Lungdongh kan i fawih tuk pin ah “simh” kan hmang fawn. Tutan dohthlennak zong hi kan thawkka ah cun kan phul lulh cio, kan aukhuang cio i ramchung ramleng in kanmah le ti khawh tawk cio kan cawlcang. Sinain caan a hung kal, kum a hung liam i “kan i neek” manh hoi. Kan lung a dong i hriamtlai kan mino lila tampi tiang hnu an pil, hriam chiahtak in dohthlennak hnu kan chit. Micheu khat hmurka bang cun, vawlei cung ram ral-hriam tha bik 39th nak a si mi Kawl ralkap pei an si, kan tei kho hna lai lo an ti. Asi! An hriamnam a tha ko.

Sinain lungdongh ding a si lo; zoh hmanh! 1961 ah miroling Pu Hrang Nawl dirh mi Chin Liberation Army (CLA) min in hriam rak tlaih lio ah kan unau Mizo miphun ralkap MNF he tangrual in U Ne Win thi le lalaang pawl an phomh hna i India ram ah Mizoram le Kawlram ah Chinland (Chin State) vialte an rak lak/uk khawh ko.

Mahte khuakhan lairelnak ram, a luat mi ram ah an rak ser khawh ko kha mu! Tutan dohthlennak hi Pathian khuakhan le remruat ah ruat hna usih. Ralhrang rialdip uknak tang kan um caan a sau tuk cang caah, hi sal tlaihhrem uknak chungin chuah/luatter a kan duh caah kan temtuarnak a fah khunnak le kan thisen nih kan nu Chinram a kholhnak zong hi a si ti’n, Israel miphun

Egypt sal taannak in an chuahnak tuanbia he zohkep usih law ruat ko usih. Annih (Israel) zong kha mihruhraang Egypt Siangpahrang Pharaoh kut chungin an luat lai ah ni dang an tuahtuan mi nakin an rethei deuh, harnak an iin mi a zualhma deuh, an temtuarnak ai chap, an mitthli a luang deuh, an thisen a luang deuh, sinain an ca ah luatnak ram chung luhpitu a rak si.

Kannih zong kan ton mi harsatnak, sifahnak, zawttlaknak, temtuarnak le taamhalnak nih a luang cia thisen a kan philhter awk a si lo. Lungrual in, lungdong lo in kan doh ahcun kan tei hrim lai. A luang cia thisen cham khawh si ti hlah hmanh seh, kan temtuarnak le zawttlaknak vialte hi teinak nih a chuahpi mi tizu thlum nih a chilh dih te lai..Credit- Salai C. Twintwin

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum