SAC ralkap nih luhhnawh in an khangh leng ah, khuami 50 leng an tlaih hna i check hlatnak.

 

Sagaing ramthen, Kata peng, Kyaukhtungkyi khua cu nihin August 19 zinglei ah SAC ralkap nih luhhnawh in an khangh leng ah, khuami 50 leng an tlaih hna i check hlatnak an tuah, tiah cu ka khua in a zaam mi hna nih an chim,Kyaukhtungkyi khua cu August 15 zong ah Mabing peng, Ngao khua hrambunh SAC khah-lah-yiah 121, Shweku peng hrambunh khah-lah-yiah 56 le khah-mah-yiah 602 in ralkap 300 hrawng nih an rak luhhnawh cang i, cu lio zong ah tlaih a tongmi khuami an um, tiah tualchung mi pakhat nih a chim.

 

 

“SAC ralkap nih khuachung cu an khangh i, ID card check in minung 50 hrawng an tlaih hna, cu hlan ah tlaihkhih a rak tongmi cu an thlah than cang hna. I kahdohnak zong a um lo nain, SAC ralkap hna nih cun meithal puah in innlo an khangh,” tiah a chim,Kyaukhtungkyi khua cu inn 1500 hrawng umnak khua a si i, khuami 3000 renglo cu hmundang ah an zaam hna, tiah theih a si. August 18 zong ah raltuknak vanlawng pahnih hmang in SAC ralkap nih van lei in ralvennak an tuah. Kata in Ayeyarwady tiva lei a kalmi tilawng 6 cu Kata PDF nih tiva nitlaklei Mutalaykhua pawng in kan kahdoh hna, tiah Kata hriamtlai phu nih an thanh.

 

Relchap,Mindat pengchung khuate lei ah August zarhkhatnak in zawtnak rai a tam caah mi tampi an zaw hna, tiah Mindat zatlang uktu phu in tuanvo ngeitu hna nih Delta News Agency ah an chim,“An kaa nih rawl thawtnam a thei lo, an tha a dih i, an lu a fak, an lungmit, an takpum ah a bomi tete an chuak, zarh hnih tluk ihnak ah tho lo in an um hna i, khuate hmun tamdeuh ah cu zawtnak cu a zual,” tiah cu zawtnak rai in a dam cangmi Suntaung khuami, Ko Law Ha Htun nih a chim. Cu bantuk zawtnak rai cu pengkulh chung dihlak ngawt ah a karh caah, a tuanlei in sii-ai bawmhchanh an herh ngai, tiah theih a si.

 

Pengkulh zatlang uktu phu in ngandamnak lei zohkhenhtu hna nih an thlopbul ko hna nain, cu zawtnak cu zei bantuk zawtnak a si theih khawhnak seh thilri le zawtnak a tlau tiang thlopnak ding ah sii-ai kan chambau, tiah tuanvo ngeitu pakhat nih a chim,“Tu thla chung lawng ah cu zawtnak in a zaw mi cu an tam ngai, an zawt ning a fak ngai hna i tuan ah an dam kho colh lo. Zei bantuk zawtnak a si theih khawhnak thilri(seh) kan ngeih lo caah fiang tein chim a har,” tiah ngandamnak lei tuanvo ngeitu pakhat nih a chim.
Credit;The Chin Post