SAC ralkap nih faak ngai in an kah hna caah tualchung hriamtlai phu lei nih an kah ve hna

SAC ralkap nih faak ngai in an kah hna caah tualchung hriamtlai phu lei nih an kah ve hna i, kaphnih kar kahdohnak ah SAC ralkap 5 an thi, tiah Nwa Htoe Gyi PDF nih an thanh. Kaphnih kar kahdohnak kong he pehtlai in Nwa Htoe Gyi PDF in Tuanvo ngeitu pakhat nih cun, “SAC ralkap hna cu mipi thuamsawh an i hruk i, bawi khualtlawnnak an zul tiah kan theih,” tiah a chim.

 

Maung taw Ah Kahdohnak A Chuak I Palik Pakhat A Thih Lengah Palik 12 An Tlau! Rakhine ramkulh Maung taw peng Myawady khua le taringkhua karlakah nihin July 18, zinglei suimilam 10:00 in kahdohnak a chuak i, palik motor pakhat cu bomb puahhnawh a ton caah palik pakhat thi i palik bawi pakhat telh in palik 12 an tlau, tiah theih a si.

 

 

Kahdohnak a chuah lio ah ramri hngaktu palik hna nih zulhmi motor pakhat cu Myawady khua pawng ah chunhnu suimilam 12:00 hrawng ah bomb an puahhnawh i, hliamhma tuarmi hna le a thimi an um, tiah tualchung mi nih an chim.SAC ralkap le Arakan Army (AA) hna cu nihin July 18, zaan tiang ah ngol loin an i kap, tiah Maung Țaw khuami nih an chim. Cu kahdohnak ah cun SAC ralkap lei nih hriamngan an hman caah khuami hna cu himnak hmun ah an zaam hna, tiah theih a si.

 

SAC Ralkap Nih Uknak An Laak Kumkhat Leng Chungah NLD Party Chungtel 48 Nunnak A Liam!: SAC ralkap nih uknak an laak kumkhat leng chung ah MP (hlutdaw palai) 3 telh in NLD party chungtel 48 nunnak a liam i, minung 920 leng tlaih an tong, tiah theih a si. Nunnak a liammi minung 48 chung ah minung 11 cu ralram ah an nunnak a liam i, minung 8 cu thonginn chung ah an nunnak a liam. Minung 29 cu a ruang um lo in thah an si, tiah theih a si.

 

Sagaing ramThen le Magwe ramThen chung ah NLD party chungtel siloin NLD party a Tanhtu hna cu SAC ralkap le pyusawhṭi nih an inn an khangpiak hna lengah, an nunnak an laak hna, tiah NLD party nuhrin covo lei rianTuantu in Tuanvo ngeitu U Kyaw Htawy nih a chim. SAC ralkap kut in thah a tongmi NLD party chungtel 48 chung ah cun pa 43 le nu 5 an i si. Cu hna cu Kachin ramkulh in 2, Shan ramkulh in 1, Yangon ramThen in 11, Mandalay ramThen in 14, Bago ramThen in 7, Tanintharyi ramThen in 4, Sagaing ramThen le Magwe ramThen hna in an si.

 

NLD party MP thah a tong mi 3 hna chung in Mon ramkulh Bilin peng ramkulh MP U Kyaw Myo Min cu tlaih a ton hnu ah, zohchia ngai in thah a tong i a ruak cu July 6 ah Kayin ramkulh Phaan peng Minsaw khua pawng ah an rak hmuh. MP dang pahnih cu Bago ramThen MP U Ngunt Shwe le Tanintharyi ramThen KyunSuh peng in Daw Tin Yee hna an si. U Ngunt Shwe cu Covid zawtnak ruangah thonginn chungah a nunnak a liam i, kum 70 luan cangmi Daw Tin Yee cu SAC ralkap a hrialnak lam ah a nunnak a liam, tiah theih a si.

 

2020, thimnak ah NLD MP 920 nih teinak an hmuh i, cuchung in minung 109 cu tlaih an tong. MP dang tam deoh cu hmunkip ah an i dor hna, tiah U Kyaw Htawy nih a chim. SAC ralkap nih uknak an laak hnu ah NLD party chungtel lawng siloin, SAC ralkap uk duhlonak langhter in cawlcanghnak a tuahtu minung 9,369 tlaih an tong i, nunnak a liam mi 2,636 tiang an phan cang, tiah NLD party nuhrin civo lei Tuanvo ngeitu nih an thanh.

Credit; The Chin Post