SAC ralkap nih an khangh i an hrawh dih cang mi Thantlang khua cu a thar in sersiam ti loin, India le Thantlang ramri Dawn khua ah

SAC ralkap nih an khangh i an hrawh dih cang mi Thantlang khua cu a thar in sersiam ti loin, India le Thantlang ramri Dawn khua ah thial ding in SAC ramkulh cozah nih timhtuahnak a rak ngei, tiah Mizzima nih a tial. Thantlang thial an timhnak hmun, Dawn khua cu India le Myanmar ramri Tio tiva kam ah a ummi khua pakhat a si i, inn 250 hrawng umnak khua a si.

 

 

“A luancia June 30 ah khan Chin ramkulh cozah nih Thantlang khua remh le sersiam thannak ding kong ah tonbiaruahnak an rak ngei. A rawkmi Thantlang khua cu sersiam ti loin, hmundang ah thial ding in a rem hnga maw, tiah ramkulh cozah nih rampi(Union) cozah sinah halnak a tuah.An chim ning ah cun ramri zong a si caah India he i pehtonhnak ah a tha, tiah an langhter nain, rampi cozah nih lung tlinpi lonak ca kuat a leh hna,” tiah min langhter duh lo mi pakhat nih a chim.Thangtlang um SAC ralkap hna nih Thantlang khua cu voi 35 tiang an duah caah, Thantlang khuachung inn a thong leng a kang i, mipi dihlak cu India ram le ramri lei ah ralhrial in an um hna.

 

 

Relchap,Karenni ramkulh Shadawpeng Shan le Karenni ramkulh aa tonnak hmun ah a ummi SAC sakhan, Ta Ngu Soe sakhan cu Karenni ralkap; KA, KNDF(Battalion 17, 14) nih an kah hna, tiah Kn.A.C. nih an thanh. Cu kahdohnak ah cun SAC ralkap pawl cu hnu an tolh caah an sakhan cu tualchung hriamtlai phufonh hna nih an khangh, tiah an langhter.

Nawlngeihnak lak hnu in Shadaw pengchung ah tualchung hriamtlai phu nih SAC sakhan 8 an lak cang, tiah Kn.A.C nih cun an thanh.

Sagaing Ramthen, Yinmabin Peng Ah Tualchung Hriamtlai Phu Nih SAC ralkap SAC Ralkap 5 An Thah Hna: Sagaing ramthen, Yinmabin peng, Kapai khua le Paungwah khua a khangtu SAC ralkap hna cu August 20 ah tualchung hriamtlai phu nih hriamngan in an kah hna caah SAC ralkap 5 an thi, tiah theih a si.

“Kapai khua le Paungwahkhua a khaangtu SAC ralkap hna cu hriamngan 40 mm lung 5 in kan doh hna i, SAC ralkap 5 an thi, hliamhma tuar zong an tam,” tiah Tualchung hriamtlai phu in tuanvo ngeitu Bu Auth Suai nih a chim,Kapai khua le Paungwah kha a khangtu ralkap hna cu Brother Defence Force le Yinmapin pengkomh battalion 16 phufonh nih an kah hna. PDF lei cu hliamhma tuar um loin hnu an tolh, tiah theih a si.
Credit;The Chin Post