SAC Ralkap He Kahdohnak Ah Ralkap Pahnih An Thi,

SAC Ralkap He Kahdohnak Ah Ralkap Pahnih An Thi, PDF Unau Pahnih An Nunnak Liam!: Magwe ramthen, Myaing peng ah July 30 ah gate hngaktu i thleng ding in a kalmi PDF ralkap pahnih cu, SAC ralkap nih an kah hna caah an nunnak liam, tiah theih a si. Myaing peng PDF Battalion 2, Company 1 in ralkap unau Htet Kyi, kum 18 le Paing Kyi, kum20 an si. Zing sml 8:30 hrawng ah gate hngaktu i thleng ding in an kal lio ah, PDF camp he aa naihnak ah SAC ralkap an um i an kah hna caah an nunnak a liam hi a si, tiah Bo Na Kwin nih a chim.

“Annih hi uanau chuak khat te an si, hmunhman humhimnak kan tuah lio ah SAC ralkap nih an thah hna i, an ruak an khanghnak kan hmuh. A kaang dih lomi an ruak pelpawi cu kan khangh than hna,” tiah a chimchap,PDF le SAC ralkap kahdohnak ah cun SAC ralkap bawi pakhat le a kuttang pakhat an thi ve, tiah Bo Na Kwin nih a chim. PDF unau pahnih an ruh cu thlahnak an tuah lai i, cu hnuah an vui hna lai, tiah theih a si.

Ye Oo Peng Inn Khangtu SAC Ralkap Pawl Cu PDF Nih An Kah Hna Caah Ralkap 3 An Thi, Tam Ngai Hliam An Tuar!: Sagaing ramthen Ye Oo peng khuate a khangtu SAC ralkap pawl cu PDF nih kan kah hna caah ralkap 3 an thi, tiah Khin U Local Guerrilla Force tuanvo ngeitu nih a chim,July 24 lio ah motor pali nih SAC ralkap a chiah hna i, ke in Ye Oo peng khuate 13 ah an lut in innlo an khangh hna.

July 28 zanlei sang ah tintingyan khua cu thazaang tampi in an luhhnawh i hriamngan in an kah, tiah theih a si,July 29 zanlei ah tintingyan khua um, dawr khan 200 leng le inn za leng cu SAC ralkap nih an khangh. Cu inn a khangtu SAC ralkap pawl cu Depeyin dum kalnak lam chuah ah, Khin U local Guerrilla Force(KUGF), Hero Army, le Bo Lah Yawng Local Defence Force le PDF hna i bawm in kan kah hna caah SAC ralkap 3 an thi i, tam ngai hliamhma an pu, tiah Khin U local Guerrilla Force(KUGF) nih an langhter.

Myanmar Ram Ah Singapore Nih Tlaihmi Rian 7 Le Tuluk Tlaihmi Rian 1, $1 Billion Man Cu Dinhtak Dingin NUG Nih Ralrin A Pek!: Myanmar ram ah US dollar 1 billion man a simi, Singapore company nih a tlaihmi rian phun 7 le Tuluk company tlaihmi rian phun 1 cu i dinh dingin National Unity Government(NUG) nih ralrin a pek hna.Myanmar ram ah luhlinh in rian a tuantu Singapore le Tuluk cu an rian ngolh ding in NUG nih a theihter hna i, “Kan khammi rian nan tuan ko ahcun a faak bikmi dantatnak nan i huah lai,” tiah ralrin a pek hna.

NUG nih ralrin a pekmi company pawl cu; Singapore Myanmar Satoketayar Solar Power Companny nih Magwe ramthen ah dollar nuai 27 leng man 30MW(Megawatt) mei peknak sehzung, Singapore Myanmar Kyeeonkyeewa Solar Power Company nih Magwe ramthen thiam ah dollar nuai 28 leng man mei peknak sehzung, Singapore Myanmar Kindar Solar Power nih Mandalay ramthen ah dollar nuai 27 leng man 30MW mei peknak sehzung, Pago, Yangon le a dangdang hmun hna ah mei peknak sehzung rian hna an i hmaithlak mi a si.

Credit;The Chin Post