Russia President Putin nih Ukraine ram ah ralkap minung 300,000 akuat mi hna hi zetin mipi ruah nak

Russia President Putin nih Ukraine ram ah ralkap minung 300,000 ka auh lai tiah nawl a chuah hnu Russia ram mino a zaam mi an tam tiah theih a si.

 

Nizaan ah khan President Putin nih cun ralkap 300,000 cu Ukraine ram ah kuat an si lai tiah nawl a chuah. Cu thawng cu TV in mizapi nih an theih hnu tlawmpal ah ramdang chuah khawhnak Vanlawng Ticket vialte a dih colh ee tiah Reuters nih a ttial.

 

President Putin nih a ram mipi cu ralkap ttuan ding in a auh hna tikah ahhin kum 18-60 karlak pa hi cu auh an si men lai tiah ruah a si. Cucaah ruah lo hna in chuak kho lo ding in an kan phih sual lai tiin mino hna lakah thinphannak fak pi a chuak.

 

Russia ram in Visa theng hau lo in Turkey le Armenia ram ah dingteo in zuan khawh a si. Turkey Airlines nih cun a ralai mi Zarhte ni tiang Vanlawng ticket an book dih cang tiah an langhter.

Cun mizapi tam nawn nih lam zawh in “Ral kan duh lo” tiah an au pah. Asinain police nih zei maw zat an tlaih colh hna. An tlaih mi pa pakhat nih cun “Putin caah ka thi lai lo” tiah a auh chih hna.

Tutan ahhin Vanlawng ticket lawng a dih lo i Tlanglawng station zong zaam ai tim mi a phul bak in an phul. An zaamnak a ruang bik cu Ukraine ram ah kuat kan si sual lai ti an phan caah a si.