Russia Nih Ukraine Ah Nuclear A Hmang Lai Maw?

Russia Nih Ukraine Ah Nuclear A Hmang Lai Maw? Russia nih Ukraine ahhin nuclear a hmang lai maw? Timi biahalnak le biaalnak tete hi a tam hringhran. Keimah zong nih Ukraine War hi ka si khawh tawk tein dongcat loin  ka ngiat peng ve hna, zeidah an dirhmun asi i zeidah an chim, timi cu ka sikhawh chungin ka dothlat cikcek ve. A tawi khawh chung tawi in keimah pumpak hmuhning ka vun tial ve lai.
Russia Ralkap Tulio An Dirhmun Zeidah An Lawh? Ukraine ahhin Putin nih nuclear a hmang lai maw? Timi biahalnak hi kan nih pawl caah chim lo Putin hrang hmanh ah lehawk a tha lomi thil asi lai, tiah kei nih cun ka hmuh. Aruang cu Putin hi sungh a duh bak lomi lungkhong taktak mi asi i, cun tutan Ukraine raal a sungh citcet ahcun a ram sipuaizi, ramdang nih bochannak a tlak tuk dingmi cu chim loin Putin hrang a himlonak lam ai sial asi lai. Cucu a theih tuk caah athapi dihlak in Ukraine hi a kah.
Mitampi nih Russia nih a thapi dihlak in a kap lo kan ti khawh men lai nain, nawlnawlh in ralkap a lakmi, ramdang sinin bawmh a halmi, kum khat i raal hriamnam ca i a hmanmi phaisa le tulio Ukraine hriamnam a kuatmi, Ukraine i hriamnam a sunghmi, ramdang i zuar dingin signed a thut cang nain raal ruangah a kuat khawh ti lomi, ramdang i hriamnam a chiahmi a lak viar than i Ukraine i a kuat viar ning zoh in al awk a um lo. Ukraine le Russia cawlcanghnak video le photo cu nikhat ah thong tampi in ka zoh peng ve hna, Ukraine nih tank pakhat an sungh ahcun Russia nih pa hra tluk an sung.
Cucu anmah Russia zumhtlak media pawl in hmuh le theih khawh viar an si. Cucaah Russia nih tuhi cu a thapi dihlak in Ukraine pengkulh pa 4 a lakmi, Donetsk Oblast, Kherson Oblast, Luhansk Oblast, le Zaporizhzhia Oblast, hi a ven Crimea telh loin. Phundang i kan chim asi ahcun hi pengkulh 4 chung i Russia ralkap Ukraine nih an thawl khawh viar ahcun Russia ralkap thazaang nih hin a rampi venhimnak thazaang hmanh ai ngeih thitha kho ti lai lo. Nuclear telhlo le bang cun Malaysia hmanh nih Russia hi luhhnawh sehlaw a lak khawh cang men lai, cu dirhmun ah phak asi ahcun. Cucaah Russia nih Ukraine pengkulh 4 a lakmi hi a thapi dihlak in a ven cikcek mi asi timi hi kan theih ah a tha.
Ukraine Dirhmun Teh Zeidah A Lawh Ve? Ukraine nih a rak i ngeih ciammi hriamnam cu Russia nih an hrawhpiak dih cang hna, tu i an hman mi pawl khi cu US le NATO nih an bawmhnak lawngte an si cang hna. Ukraine nih pehtlaiin raal hi a do thluahmah kho lai maw, timi cu zeitindah US le NATO nih a bawmh lai, timi ahkhin ai hngatmi asi. Ralkap lei ahcun Ukraine kum 18 in 65 tluk nih cun ram le miphun caah an i pe dihnawn caah minung kongah cun an buai lo, hriamnam kong tu hi an buainak le an thihnunnak cu asi deuh.
Russia nih a lakmi pengkulh 4 khi Ukraine nih an lak thluahmah or hmai an fongh kho tuk, kan ti ko nain hmun nga then ah hmunkhat tluk hrawng lawng khi an lak than khawhmi asi rih. Khuasik nih a tla cuahmah, Russia nih a thapi dihlak in a ven ve hoi, US le NATO nih hriamnam ngan taktak in an bawmh ve lo tikah, zeitihmanh in tukum chung ahcun a chut kho ti hna lai lo. Cucu Russia le Pro Russia caah an riantuannak le mipi lunglaknak caah caantha asi ve lai caah khiasik adih in vun kah than ding cu Ukraine caah thil harsa tuk a si cang lai.
Cucaah Ukraine nih pengkulh pa 4 hi a ningpi in cun a chut kho theng ti lai lo, caan zong nih a pe ti lo, Russia hriamnam tha le thapi vialte ai bunghnak asi ve caah tu Ukraine hriamnam ngeihmi nih cutluk taitai in dawikhawhnak thazaang asi lo. Cucu Russia nih ai fian ve caah a ven bak i a tih tukmi cu US le NATO nih hriamnam ngantuk an bawmh sual lai ti khi asi. Nuclear hman kai thlachiat lai lo tiah Putin nih a chimmi zong kha zeidang siloin US nih hi pengkulh 4 dawikhawhnak hriamnam ngan Ukraine a kuat sual lai ti kha a phantuk caah a rak i hrocer bia khi asi bik. Cucaah Ukraine hrang ahcun Crimea chuhthan cu chim lo hi pengkulh 4 vun chuhthan ding hman hi thil fawi cu asi lo.
Zeibantuk Dirhmun Ahkhin Putin Nih Nuclear Ahman Lai? Pengkulh 4 Russia nih a chuhmi hi Ukraine nih a chuh khawhviar pin ah, Crimea zong khi a lak than asi ahcun, misualpa Putin nih nuclear cu a hman hrimhrim lai hi ka zumh. Nuclear hi “tactical nuclear” le “strategic nuclear” tiin an um i raal ram i hmanmi hi tactical nuclear deuh an si i thazaang a derdeuh, cucu a hman lai zumh deuh mi cu asi. Nuclear a hman lo hmanh ah hi pengkulh pa 4 ah a ralkap pawl an sungh asi ahcun misualpa Putin nihhin Ukraine khuapi pawl Kyiv, Kharkiv le Lviv ti bantuk civilian pawl umnak hi ngan loin missile a ngeih um-ek in a kah lai hi ka zumh ngai. Ukraine President Zelensky umnak inn le cozah inn vialte zonghi ngan loin a kah hrimhrim lai hi zumh a um ngaingai.
Russia Nih Hin Nuclear Hi Hei Hmang Sehlaw US le NATO Nih Zeitin An Lehrulh Lai? Theih asi lo Russia nih Ukraine ah hin nuclear hmang sehlaw zeitindah US nih a lenrulh lai timi cu. US nih faktuk in lehrulhnak kan tuah lai tiin cun a ti ko, asinain ka zumh ning ahcun nuclear in lehrulhnak cu a tuah lai zumh a um kho lo. Thil pahnih a um kho mi cu; Russia nih nuclear a hman cang lai timi signals a umpah ahcun US nih missile defense systems tha cungcuang, MIM-104 Patrol, THAAD le David Sling hrawng khi a rannak in Ukraine ramah a kuat khawh. Direct in vai rolh colh cu a duh lai zumh a umlo caah Kyiv le Kharkiv hrawngah US ralkap vengtu dingah a kuat khawh.
Asiloah, Ukraine a bawmh bal lomi F-16 fighters le F-35 Lightning tepawl tiang khin biatak tein Ukraine hi amah tein ai veng kho dingin hriamnam ngan taktak a pek lai zumh a um deuh. Putin nih Ukraine ah Russian holh hmangmi ka runven hna a timi nakin a chungmuru ai timhmi cu Soviet Union chan i a dirhmun khi dirter than i ram kauh a duhdeuh bia asi. US nih Ukraine runven taktak nakin Ukraine hmangin Russia thapi chah viar hi ai timhmi taktak cu asi ve. Cucaah Russia nih Ukraine ah nuclear a hmang lai maw? Timi biahalnak cu tu ahcun lehawk a thami thil asi rih lo, Russia dirhmun le Ukraine dirhmun nifatin an i kahdohnak ah ai hngatmi asi.