Ruahnak Palhsual Bu In Ralhrang Dirpi Hrim Hlah Usih

Ruahnak palhsual bu in ralhrang dirpi hrim hlah usih! Kan hnulei zeimawzat a liamcia mi thla ah Total Chevron Company pawl Myanmar ram in kan chuak cang lai, tiah cathanh an rak chuah mi kha kan ciin cio rih lai ka zumh. Hihi a ngaite cu ramchung ramleng in mifimthiam hna thawng in le rammi mizapi kanmah thawng in a si. Hi hna pawl hi ralkap thalo hna he kum tampi rian a tuanti mi an si hna. Atu bantuk in Myanmar ram in kan chuak cang lai, tiah an thanh tik ah khuaruahhar lunglawmhnak ni a tlang, ti tluk khi a si.

Atu ka cabia hin mizapi nih fiangraang tein kan hngalh khawh nakhnga ka vun tial ko lai. Thisen he kan kilhkamh mi tangka ti mi khi a taktak cu ralkap thalo hna sin ah tangka fangkhat hmanh lut hlah seh, tinak khi a si. Ral kan ti mi cu tangka a um lo ahcun zeitihmanh in doh khawh a si lo. Cucaah, Kawl ralkap thalo sin ah a luut mi tangka dihlak cu rammi mizapi thahnak hriamnaam lila ah an cang than lai.

Cucaah, ramchung chawhrawlnak company hna nih ralkap thalo uknak an doh bantuk in ramleng in tangka luhnak a si mi zinaan le gas tehna company (MOGE) zong kan kham khawh ding hi a biapi taktak mi a si. Atu hi rammi mizapi kan i zuamnak le tanrualnak thawng in cu bantuk company pawl cu Myanmar ram in an chuak cang. European Union (EU) zong nih MOGE cu dan a that i phihkharnak a tuah cang. Nain, atu hi kan nawr than ding mi asiloah kan thawl than ding mi company 3 a taang rih.

Company pawl an chuak cang, kan ti nain cu hna pawl nih ralkap thalo pawl kha tanga dollar 250 million an bat rih hna. A ngaite ti ahcun cu tangka zong cu ralkap thalo hna ta a si lo. Myanmar rammi kan dihlak ta a si. Kanmah ngeih mi a si. Cucaah, hi tangka hi ralkap thalo hna kutcung phan kho lo ding in Freeze a si khawh nakhnga kan i zuam a herh fawn.

Tangka umtuning in vun fianter ahcun, kan hnulei ah khan Ei Pencilo le C2D i bawm in Dragon Fly Project in tangka an kawl i an hmuh mi kha nuai 2.2 (million) a si. Ralkap nih an hmuh ding mi nuai 250 (million) he tuakchun tik ah alet zakhat leng in a tam tinak a si i cucu ralkap thalo hna kutcung a phanh khawh lo nakding kan i zuam a herh.

EU nih an ngeih mi phungphai ning ah Sanction an chiahpiak hna nain anmah he aa pehtlai mi ram pawl sin in luat khawhnak nawl phun 2 halnak nawl an ngei. Cu hna ram pawl nih an cohlan ahcun pehtlai in tawlrel khawh a si. Atu tiang hi US Cozah nih phihkharnak taktak a tuah rih lo.

A tawinak in kan chim a si ahcun mah hi company pawl nih hin ralkap thalo pawl tangka an pek ding mi hna kha pe kholo ding in kham, French Cozah zong nih hi company pawl hi zohsawh lo ding le US Cozah zong nih MOGE hi dantat in phihkharnak tuah ding tiin hi thil phun 3 hi hal than hrimhrim a herh mi a si. Hi kong ah ahodah tuanvo a ngei, tiah cun Myanmar rammi kan dihlak hi tuanvo ngeitu kan si. Cun, NUG Cozah hi an biapi taktak fawn. Cun, ramchung ramleng Media pawl le rammi kan dihlak hi kan bipi tuk hringhran.

Chim ko ahcun, ralkap thalo he a tuanti mi companies hna hi Myanmar ram in an chuak te lai, tiah zeitik hmanh ah kan mang kan manh bal lo. Cucaah, hihi rammi nih kan tei hna, tinak a langhnak pakhat a si. Asinain, a thlithup riantuannak timi mizapi hngalhlokar in tangka pek ziar i riantuanti tibantuk a um khawh caah hihi mizapi nih kan hgnalh a herh i kan i ralrin zong a herh mi a si.

Ralkap thalo nih atulio dohthlennak rian a tuantu hna bawmhnak a petu hna pohpoh cu an tlaih hna ti cu zapi hngalh a si ko. Tangka a um lawng ah hriamnaam ti mi cu a um cu mu. Cucaah, rammi nih ralkap thalo he aa pehtlai mi tangka luhnak asiloah chawhrawlnak pohpoh kha kan hrial hrimhrim a herh.

Lih le hrokhrol in aa thawk ralkap thalo hna hi an thazaang a thawn nakding rian pawl kha kan ngol a herh. Kan hrial a herh. Cucu, a cunglei kan chim mi tangka ruang ah a si bik. Cucaah, rammi kan dihlak kan lungfim a herh i kan i ralrin a herh. Crd – TFT

Rel chap – ┬áKum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum