Ralkap thazaangchap in Helicopter in mipi doh ding in timh tuah nak an rak ngeih mi cu

Matupi Khua Ah SAC Ralkap Nih Helicopter In Hriamnam Thazaang An Chap!Chin ramkulh, Matupi peng byu-ha-kone(ဗျူဟာကုန်း) le 140 battalion kar ah SAC ralkap nih helicopter pakhat in September 3, ah hriamnam thazaang le riahcaw an chap tiah, theih a si. Matupi pengchung ah SAC ralkap helicopter a phak hnu ah emergency gate tuah in khua luh/chuahnak gate ah humhimnak hngak tu thazaang an chap tiah, theih a si.

 

“September 3, Matupi ah SAC ralkap helicopter a tum caah Non-CDM tamdeuh cu an i nuam ngai. Sianginn hman ding cauk an kan phorh lai, rian tuantu thar a ratpi hna lai i Matupi ah a ummi rian tuantu thial ding tiin an ruah. A tu ah cun an ruahning si lo in hriamnam thazaang tampi tu a rak phorh” tiah Matupi khuami pakhat nih a chim.

 

Matupi in hmundang ah aa thial dingmi hna cu humhimnak ruah ruang ah nihin tiang an i thial kho rih hna lo. Pengkomh uktu zong tuanvo a ngeihnak hmun ah i thial kholo in Matupi khuachung ah a umnak thlali hrawng a si cang.

Relchap,SAC Ralkap Meithal Thlahnak In Kalaymyo Ah Tualchungmi Pakhat Nunnak A Liam!
Sagaing ramthen, Kalaymyo, Hmuntha sang ah nihin September 3, zanlei suimilam 4:00 luan ah SAC ralkap nih kah thlorh in meithal an thlah caah tualchung mi pa pakhat cu hliam a pu i, nunnak a liam. Cu pin ah midang pa pakhat zong fak ngai in hliamhma a tuar, tiah theih a si.

SAC ralkap hna nih Myohla, Indaikune sang in Latpankhone(လက်ပံခုံ) khua kalnak lam lei ah check hlatnak an tuah i, an kir lei ah cu ralkap hna cu bomb puahhnawh in kahdoh an tong. Bomb puahhnawh a tongmi SAC ralkap lei cu a thimi le hliamtuarmi an um lo, lampi thluan ah tinh mi ngei loin kah thlorh in meithal an thlah, tiah theih a si.

SAC ralkap kuan aa tonsual mi, Hmuntha sang no.3 lamkam ah ummi mitlamtlinglo kum 40 luan tluk pa pakhat cu a hngawng ah kuan nih a hliamh caah a hma a fak ngai, tiah theih a si. Cun, Hmuntha sang no.3 lam ah a ummi kum 40 luan hrawng pa pakhat cu inn chung a um lio ah kkhen i a nunnak a liam, tiah theih a si.
Credit;The Chin Post