Ralkap Hna Cu Hmailei Ah An I Thawn Kho Lo

14/10/21 Ralhrang hna cu Falam peng Rialti khua kiangkap ah an um ko rih,Hmailei ah an i thawn kho lo ti si. Relchap –  Hniarlawn khua thar pawng ralhrang he i kahnak ah ralhraang lei panga an thi. Tu zing suimilaam 10:00 hrawng ah, Hakha khua he lam naih te ah a um mi Hniarlawn khua thar pawng ah CNA le CDF i bawm in Council ralhraang he i kahnak a chuak i ralhraang lei in panga an thi tiah.

CNF Chimphunnak nawl ngeitu Salai Htet Ni nih a chim. Hakha khua chuahnak, Hniarlawn thar ah tu zing sml. 10:00 hrawng ah kahnak a chuak. Council ralkap panga an thi. Kanmah CNA le CDF aa bawm mi lei in hliamhma a pu mi an um lo. Meng 6 a hlaatnak hmun ah Council ralkap lei nih hriamnam ngan in kahnak cu a um. Hmaitonh in an i kap ti khawh cu a si lo. Anmah lei nih zawndamh in an kah mi a si,” tiah Khomumthung ah a chim.

Hniarlawn thar khuami cu an zaam dih i a zaam kho lo mi inn li-nga an um, ralhraang nih zaam taak mi inn an boh hna tiah khuami pakhat sin in kan theih. Tu zing ah khan kum 13 ngakchia pakhat tel in minung pali Council ralhraang nih an tlaih hna i Skat motor pakhat zong an kalpi tiah kan theih. Chin Ramkulh, Falam peng, Falam le Hakha karlak motor lam cung ah a um mi.

Rialti khua ah Baptist biakinn tel in, inn pali cu Council ralhraang pawl nih nihin October 13, zaanlei suimilaam 3:30 hrawng ah mei in an duah tiah khuami hna sin in theih a si. Rialti khua cu inn 10 fai an si i Falam khua in meng 8 hrawng a hla. Council ralhraang pawl cu Lungpi khua lonh ah an mortor an dirter i Lungpi khuachung ah ar, vok le meheh pawl an kah hna. Inn chung ah a um mi facang, chiti le cite tibantuk an fir.

Crd – THP