Ralhrang nih mipi in le lo an duah piak pin hna ah nu ngak tleirawl tleih dingin an dawi hna mipi cu zam in

 

Kalay peng Kalay-Gangaw lampi cung ah ummi, Chin mi umnak Tharyarkone khua pawng ah SAC ralkap le tualchung hriamtlai phu kar zarhkhat tluk rau in kahdohnak a chuah hnu ah SAC ralkap nih Tharyarkone khuachung ah Biakinn telh in inn 52 an khangh i, khuami 2 cu a ruang um loin an thah hna, tiah tualchung mi nih an chim,

 

August 2 in August 5 tiang kaphnih kar kahdohnak a chuak. Nihin August 8 tiang ah SAC ralkap hna cu Tharyarkone khua ah umhmun an khuar rih caah, cuka khua pawng hrawng ummi khua 5 in khuami hna cu a himnak hmun ah an zaam hna, tiah theih a si.

 

Khuami pakhat nih a chimning ah cun, “Atu tiang SAC ralkap nih khuachung ah umhmun an khuar caah, khuachung ah khuami an lut ngam rih lo. Drone in khuachung an zohnak ah cun Biakinn telh in inn 50 le facang chiahnak inn 2 tiin, inn 52 an khangh cang. Kum 54 tluk pa pakhat cu an inn hmai ah meithal in an kahthah. Cun, a ke khat lei a bulmi Santa khuami cu Tharyarkone khua pawng ah an kahthah ve. Khuami 51 an tlaih hna nain atu ah cun an thlah than cang hna,” tiah a chim.

 

SAC ralkap pawl nih cun Kalay Technological University le khuachung in hriamngan an kah bawmh hna. SAC ralkap hriamngan kahnak ruang ah tualchung hriamtlai phu chungtel 3 an nunnak a liam i, 17 hliamhma an tuar tiah theih a si. Tharyarkone khua cu inn 340 leng umnak khua a si i, Chin mi umnak khua pakhat a si. Kalaymyo he meng 7 a hlatnak ah a ummi a si.
Credit;The Chin Post