Pyosawthi Umnak Tat Kone Khua Cu PDF Phufonh Nih An Luhhnawh I Pyosawthi 7 An Thi

 

Pyosawthi Umnak Tat Kone Khua Cu PDF Phufonh Nih An Luhhnawh I Pyosawthi 7 An Thi: Magwe ramthen Pauk peng, pyosawthi pawl umhmun khuarnak Tat Kone khua cu ‘Zeyar Thaw’ operation min in tualchung PDF phufonh nih nihin July 26 ah an kah hna i, pyosawthi 7 an thih lengah midang zeimawzat hliam an tuar, tiah Young Revolution Front-YRF nih an thanh.

Kahdohnak cu tuzing Sml 5 in 7 tiang a rau i SAC ralkap le pyosawthi meithal zuun khat, Uzi kuan 24, G3 kuan 3, 5.56 kuan 69, kah-pah-sahkuan 29 le kut cheh bomb pakhat cu PDF nih an laak, tiah theih a si.Pyosawthi le SAC ralkap umhmun an kuarnak Tat kone khua hi Southern Pauk Guerillas Force(SPGF), YDF Saw battallion 9 & 10, Yenangyaung PDF battallion 721, PPC, Pauk PDF battallion 4 & 6, CAF-SPU PDF le Young Revolution Front-YRF hna i bawm in an kah hna. PDF phufonh lei cu hliam tuar um loin hnu an tolh than, tiah theih a si.

Magwe Ramhen Pauk Peng Ah SAC Ralkap Nih Ngakchia 4 Le Upa 3 An Thah Hna!: Nihin July 26, zinglei ah Magwe ramthen, Pakokko pengkomh, Pauk peng, Tat Ka khua ah kahdohnak a chuak i SAC ralkap nih khuachung inn cheukhat cu an khangh. Inn kaangmi a ciamh hnu ah ngakchia 4 ruak kan hmuh, tiah Pauk peng mi bawmchantu chungtel nih an chim.

“Kum 10 tang ngakchia 4 cu mei in an khangh chih hna. Kum 30 hrawng nu pakhat le pa 2 cu kuan hliamhnak in an nunnak a liam,” tiah tualchung mibawmchantu pakhat nih a chim. Meithal kah in nunnak a liammi pa 2 cu tualchung hriamtlai phu chungtel an si i, nu pakhat cu mi sawhsawh a si, tiah tualchung mi nih a chimchap.

“Nihin July 26, zinglei suimilam 6:00 hrawng ahkhan khuachung cu SAC ralkap 500 hrawng nih an kulh i, cu hnu ah tualchung hriamtlai phu hna he an i kap. Tualchung hriamtlai phu lei in ralkap 2 nunnak liam i, meithal 1, kut cheh bomb lung khat le kuan zun 94 hrawng a tlau,” tiah Tat Konetualchung hriamtlai phu he naihniam in ummi pakhat nih a chim.

Khin U Peng Ah PDF Pakhat Cu Ngakchia A Chanhnak Ah A Nunnak Liam!: Sagaing ramthen, Khin U peng ah kuan hliamhma a pu mi ngakchia pakhat chanh ding in a kal mi PDF pakhat cu a nunnak a liam, tiah tualchung thawnglatu nih an thanh.

SAC ralkap hna nih nihin July 26 zinglei ah Khin U peng, Man Kyi khua cu an luhhnawh i, hriamngan an thlah caah khuami vialte cu an zaam dih hna, tiah theih a si. Hriamngan cu ruahdamh in an kah caah, kum 13 ngakchia pakhat cu a baan le a taang ah hliam a pu i, khuami cheukhat a zaam kho lo mi zong an um, tiah tualchung mi nih an chim.

Ngakchia hliam a pu mi cu sii-ai he thlopbul ding in PDF pakhat nih a va zuanhnawh i, a nunnak a liam, tiah theih a si. Hliam a tuar mi ngakhia cu SAC ralkap nih Man Kyi khua nichuah lei tikhor pakhat ah an thlak i, a nunnak a liam cang, tiah tualchung mi nih an chim. Ngakchia ruak cu va laak ding in a hringtu nu a va kal tikah SAC ralkap pawl nih an rak tlaih ve i, a thil mansung pawl zong an chuh dih pinah, an tukvelh i an kalpi, tiah tualchung mi sin in theih a si.

 

SAC ralkap hna cu tuzing Sml 5:30 hrawng ah Man Kyi khua an lut i, Man Kyi khua pawngkam khua 3 in mizapi cu an zaam hna, tiah theih a si. Khin U peng khuate pawl ah SAC ralkap pawl cu nifatin rallam an sial ruangah tualchung mi 5000 leng an zaam cang. Nizaan (July 25) zong ah Khin U peng nichuah lei Yuasin khua le Chemyitgyi khua cu an duah, tiah theih a si.

 

Kani Ah SAC Ralkap Tilawng Ni Hnih Chung Kahdoh An Tong I Ralkap 5 An Thi!: Sagaing ramthen, Kani peng Chindwin tiva cung i SAC ralkap tilawng hna cu July 24 le July 25 ah tualchung hriamtlai phu nih an kah hna i PDF lei sniper kahnak in SAC ralkap 5 an thi, tiah KyauklungkyiKLG PDF nih an thanh.

 

SAC ralkap thilri phortu tilawng 9 cu Muaipuai khua le Kinkhua pawng ah Kyauklungkyi ( KLG PDF le tualchung hriamtlai phufonh nih an kahdoh hna. Cu kahdohnak ah cun sniper kahnak in SAC ralkap 5 an thi, tiah theih a si.