Pa Pathian Nih A Philh Hna Lo

Pathian nih a philh hna lo!  Bible chan ah ‘Persia’ tiah rak auh a simi Iran ram hi Pathian miphun, Judah saltannak in luatertu, Jerusalem biakinn remhnak riantuannak caah bawmtu le Khrih khamhnak thawngtha cohlang hmaisa biktu miphun lak ah aa telmi an rak si. Kan Bible chung ah zumlotu a si nain khuaruahar taktak in Pathian nih bia a rak ruahmi siangpahrang Cyrus zong khi Iran (Persia) dawh a si cuh.

Siangpahrang Cyrus kong ah Pathian riantuanning le bang hi cu a mak taktak. Cyrus a chuah hlanpi kum 150 lio in Prophet Isaiah sinah Pathian nih “Cyrus nih Jerusalem khuapi a sak tthan te lai nak kong” fiang tein a rak chim chung cang (Isai. 44:28). A min zong Pathian nih Isaiah sinah a rak chimh cia! Cucu, kum 150 hrawng a rauh hnu ah a tak in a hung tling i.

Cyrus nihcun prophet chim chung ning tein Judah miphun luatnak a pek hna, Jerusalem khuapi le biakinn tiang a remhter hna (2 Chanrelnak 36:22-23; Ezra 1:1-4). Nihin tiang ah hlan lio Iran siangpahrang Cyrus cu Judah miphun nih an uar tuk caah Israel prime minister Benjamin tiang nih ‘Jerusalem khuapi cu Israel ta si’ atitu US president Donald Trump cu “Siangpahrang Cyrus bantuk a si” ti tiang zong a rak ti phah.

Cu bantuk in an pupa chan ah Pathian nih tinhmi tlintertu le Pathian bia cohlang hmaisa tu an rak sinak te kha nihin ah Bawipa nih a philh piak hna lo. 2018 World Mission report ning ahcun vawlei cung ah Iran ram hi a thli tein zumtu (khrihfa) an karh biknak ram a si, tiah an ti. Nifatin te a za za le a thong thong in Jesuh khrih a cohlangtu, zumtu thar an karh zungzal, ti a si.

Kap khat lei ah Iran khrihfa hna cu vawlei cung ah khrihfa ah hrem tuar biktu phu hra lak ah aa telmi an si fawn. Khrihfa Pathian a hua biktu cozah tang ah an um nain Bawipa nih a philh hna lo. Zungzal in zungzal tiang a hmu khotu mit in, khua a cuantu Pathian nih caan tawite vawlei ah harnak tuar hi a kan sian. “A hrang chung in a thlum a chuak” timi dirhmun ah Pathian nih a chiah cang hna.

Pupa chan ah Pathian a rak kawlmi miphun le hrinsor hna cu caan karlak tlau in um hmanh hna sehlaw, Pathian nih amah lei panh tthannak caan ttha le laam a serpiak than lengmang ko hna; Pathian nih a philh hna lo. Cucaah Kanmah chan ah Pathian duhnak a kawlmi miphun le chungkhar si hi kan saduhthah cio si hram seh!Lawmhnak he,Hram Bik Lian.