NUG Vuanci Le Kan Dr te Bia Sum Nun Kan Ngeih Lo Caah Mipi Nunnak Tampi A Liam!!

NUG Vuanci Le Kan Dr te Bia Sum Nun Kan Ngeih Lo Caah Mipi Nunnak Tampi A Liam!!
=============================
Dai tein um ko ning kan ti nain CNA CDF cu Jet Fighters in an kan kah ve cang caah ka holh ve. Chin Pasalṭha Col. Solomon Thang Din nih Media ah raltuknak kong thlah hlah uh, nan kan thah asi an kan ti. Mipi nih a bia ngaih cang usih. Nain mipi lawng kan si lo, Media le Interview ah bia aa sum lomi hi NUG Vuanci hna le CHIN Kan Dr te an si.

Secret le Confidential nun kan ngeih lo caah, EAO le Tlangcung mi karlak ah pumkhat si nak le rualrem nak aum khawh ti lo. Bia kan thlah sawhsawh ruang ah Kalay Myo ah tuksapur mipi thahnawnnak a tlung bal cang (CDF PDF um hlan ah). Vanlawng kahnak kan ngeih cang tiah Media ah nan ti cangka in Sakai (Ṭanse le Shwebo) ah Vanlawng 8 bak in an kah colh.

EAO he Raldoh hmanh ah hi zat ahmang ballo. Jet fighter loin Helicopter (1-2) tu an hmang tawn. Tu cu Ramdang Raldoh bang an kan doh cang. Mipi le PDF LDF tampi kan thi.

Innlo le khuaram tampi a rawk. SAC Jet Fighters le Helicopter cu an kahthlak men lai kan ti nain, asi ti lo. Raldohnak a fak bik nak Sakai le Makui ah Vanlawng kah nak chiah loin, NUG Vuanci le Kusale inn ah nan chiah rua ka ti.

NUG Vuanci le Dr te nih “kan NGEIH KO, KAN NGEIH KO” nan ti lio ah Mipi le PDF LDF cu “kan thih ko, kan thih ko” tiah leh awk in thil a kal cang.

Raldohnak ni fatin aum zungzal nak KARENNI, Karen, Kachin le CHIN ah Vanlawng kahnak nan chiah ti lo. Phiangkum Bantukin Raldohnak Kawlrawn, Ygn le Mdy ah maw nan chiah sual kan in ti hna.
“Sakap hlan ah CHAWL PHAH HLAH” “A Awn Ruangah Uitlak le Thereng an thi” tuan phung kha.

Vanlawng kahnak kong hi Chimhrel lo le phuang lo ah asi khawh hrim lo maw? Vanlawng kahnak kan ngeih cu MAH kan thluk cang tinak asi lo dakaw? CDF / PDF / LDF sin ah phan hnu ah, Jet Fighters le Helicopter an kah thlak hnu lawng ah SAC nih an hngalh awk asi.

MAH cu Maymyo kal ding a ti mi cu Media nih an hngalh caah Mawlamyaing lei aa merh. Dan kan tat hna lai a ti.

SAC le Rallokap tlukin Bia I sum nun kan ngeih lo. Phaisa tampi le nunnak tampi dih in, Spy le Intellegents herh lem loin mah tein Nika kan I pho zungzal ko.

Social Media aum cu, MAH caah spy asi ko lo maw? Mipi cu kan mawh lo, NUG VUANCI le Dr te hrim pei MAH caah SPY ṭuan mi ko nan lawh fam cu.

Saphu Thalhma aa chimh bang kanmah tein kan Thalhma kan I phuang. A poi tuk ee. NUG nih Vanlawng kah nak kan ngeih tiah nan phuang rih in, Mipi cu Jet Fighter le Helicopters lawng in an kan khah cang. Lungfak ngai mi cu Hakha ah kah ding in an ra ve cang.

Phuang ding ah kan I sum khawh lo ahcun, Bia dang deuh in, SAC hngalh khawh lo ding in, SPY holh in chimh ding asi. NUG Vuanci le Dr te si buin mah hi hi kan thiam rih lo mi hi kan poi ve dakaw.

2023 ah MAH thluk ding ti cu nan thiam tuk. Kan tei lo ahcun CHANCHUNG SAAL kan si lai tiah mipi kan ti dih cang. Kei zong Chi pumkhat le Thetse fangkhat Bantukin Dohthlennak adih hlan tiang I tel ding ah bia kaa kam ve. CDF Tidan kan kai ah biakam nak he kan si cang.

Hi hnu ah cun, Mipi le PDF CDF thihlohnak, Tlangcung mi le EAO ṭhen Cheuhnak bia vialte I sum cang rawh uh tiah zang fah kan nawl ko hna. Crd-Joseph R. Thang

Relchap, ZRA Nih Mipi Hriamthil Nan Pek Ṭhanlo A Si Ahcun A Herhning In Hmanlaknak Kan Tuahlai-PDF-Zoland, Chin ramkulh, Tedim peng ah mipi hna nih an thlanti he an cawkmi hrianthil hna cu ZRA hriamtlai phu nih fir in an i zaampi, cucaah mipi sin ah an pek ṭhanlo a si ah cun a herhning in hmalaknak kan tuah lai tiah PDF-Zoland nih an thanh tiah theih a si.

October 14 ah Manipur tiva Mansaung hleidonh ah ZRA phu hna nih dohthlennak ding caah hmandingmi hriamthil a phurtu mino 2 cu an tlaih hna, cun an hrem hna hnu ah an hriamthil an chuh hna.

Cu hnu October 15 ah Saizaang khuachung ah lut in khuami hna cu checkhlatnak tuah in lungretheihnak an pek hna tiah theih a si.

Khuachung ah buaibainak chuahter kan duhlo caah PDF Zoland mino hna khuachung an luh hlan ah, ZRA nih an chuhmi hriamthil cu pek ṭhan in khuachung in dai tein chuah ding ah phone in pehtlaih le chimhruah an si ko na in, an duhlo caah an hmanmi cycle cu chiatak in kee in an zaam tiah theih a si.

An hmanmi cycle cu Tedim Public Administration nih an fim tiah theih a si.

ZRA phu hna nih an kaltakmi cycle hna cu Mansaung hleidonh um mipi hna sin ah chuhmi thil hna he nan van thlen khawh, mipi thilri nan lakmi nan pek ṭhanlo a si ah cun ZRA cu misual phu, SAC ralkap hmanrua tiin cohlan le hmalaknak tuah nan si lai tiah PDF Zoland nih ralrin peknak an thanh.

Tedim peng, Tonzang peng le Kalaymyo um ZRA phu thazaang a petu hna cu mi zei nansi hmanh ah, a dikmi dohthlengtu phu nih kan in veng hna lailo tiah PDF-Zoland nih an thanhmi ah cun an langhter chih.

Monywa Thong Inn Ah Poh-mah 505 In Biakhiahnak Tuahpiak Mi Hmundang Ah Ṭhial An Tong, October 17, chun suimilam 12:00 hrawng ah Monywa thonginn in poh-mah 505 he biakhiahnak tuahpiak mi thongtla minung 70 hrawng cu Myinchain thonginn ah an ṭhial hna tiah ṭhial a tong ve mi thongtla pakhat i a chungkhar nih an chim tiah theih a si.

“Kum hnih tla ding in biakhiahnak an tuahmi an si, a chuah lai ni zong a nai cang, a hohmanh theihternak tuahlo in hmundang thonginn ah an ṭhial hna. Kan hnu teah khan thongtla mi hna cu minung pakhat ah singthum an hal hna, cu lio i phaisa a pe kholo mi paoh hi ṭhialmi an si rua” tiah a chim.

Thongtla mi hna hi thonginn lei ṭuanvo ngeitu hna nih a lam kip in phaisa an hal tawn hna tiah thongtla chungkhar hna nih an chim. Phaisa a pe kholo mi hna cu fakngai in an hrem tawn hna, hliamhma an tuarmi i thlopnak sii an pek hna lo ruangah nunnak liammi thongtla zong an um tiah theih a si.

Pathein Ah Mino 20 Hrawng PDF He Pehtlaihnak Nan Ngei Ti In SAC Nih An Tlaih Hna, Ayeyarwaddy ramṭhen Pathein ah SAC ralkap nih October ni 14 thok in tualchung mino hna cu PDF he pehtlaihnak nan ngei ti in an purh dah hna ca ah an tlaih hna tiah tlaih a tongmi chungkhar hna sin in theih a si.

Tlaih a tongmi mino tam deuh cu pa deuh an si na in nu zong an i tel ve, cun anmah te in sii-inn a ong mi sibawi cheukhat zong an i tel tiah theih a si.

Tlaih a tongmi hna cu Southwest Regional Command (အနောက်တောင်တိုင်းစစ်ဌာနချုပ်) ah an kalpi hna i checkhlatnak an tuah hna tiah kan theih nain a tutiang pehtlaihnak kan tuah kho hna lo tiah tlaih a tongmi chungkhar hna sin in theih a si.

Wundwin Penguk Zung Lutlai Le A Kuttang Minung Pahnih Rawl An Ei Lio Ah Thah An Tong, Mandalay ramṭhen, Wundwin(ဝမ်းတွင်း) khuachung ah SAC ralkap kuttang um penguk zung lutlai le a kuttang pa 2 cu rawl an ei lio ah kah an tong tiah theih a si.