NUG He Pehtlaihnak Tuah Dingah Malaysia Nih Biakhiahnak A Tuah Cang

US-ASEAN Summit ah a kaimi Malaysia ramleng vuanci Saifuddin Abdullah le NUG ramleng vuanci Daw Zin Mar Aung cu Washington DC i Willard Hotel ah May 14, zinglei ah tonnak an ngei tiah theih a si. Hi tonnak ah ASEAN hnatlaknak panga kong, Malaysia cozah cu Myanmar mipi hna leiah an dirnak kong le Malaysia cozah le NUG hi zeitindah hmunkhat ah rian kan ṭuan khawh lai timi kong an i ceih. Cu tonbiaruahnak kongah Daw Zin Mar Aung nih cun kaa lunghmuih ngai tiah RFA ah a chim.

Cu tonnak kong he pehtlai in Malaysia ramleng vuanci nih cun “NUG Cozah ramleng vuanci Daw Zin Mar Aung he hin online lawngin kan rak i tong, atu hi hmaitonh in a voikhatnak kan i ton a si. A sunglawi tukmi tonnak a si. Lungthiang tein bia kan i ruah kho. NUG le NUCC hi ASEAN nih cohlan dingin voihnih ka chim cang.Nizan i US-ASEAN Summit lio zongah Malaysia Prime Minister nih.

NUG he NUCC cohlan dingin US President Joe Biden sinah a chim. Cun Daw Zin Mar Aung he kan i tonnak ah mining hawi zawnruah bawmhnak kong zong kan ceih. Minung hawi zawnruah bawmhnak hna hi SAC nih hriamnam bantukin hman i an duhmi hna sin lawngah an pek ding kha kan duh lo. SAC zong nih ASEAN hnatlaknak kha ṭha tein an ṭuan ding a si.

ASEAN hnatlaknak cu SAC nih an cohlan cangmi a si. NUG zong nih an cohlan ko. Asinain atu tiang zeihmang thlennak a um lo i thah a tongmi an tam chin lengmang. A tlizammi zong an karh chin. Tuhnu kum khat kan hngak kho ti lo” tiah a chim. Cu lawng si loin thawnglatu hna nih Myanmar ram kongah Malaysia cozah lungput an halmi cu “Pakhatnak ah nawlngeihnak latu.

SAC kan cohlang lo. Pahnihnak ah Malaysia cozah nih NUG/NUCC he pehtlaihnak tuah dingin biakhiahnak kan tuah cang. Pathumnak ah Myanmar mipi hna sinah NUG sin in minung hawi zawnruah bawmhnak kan pek lai” tiah Malaysia ramleng vuanci Saifuddin Abdullah nih cun a leh hna.

Cu pinah Malaysia ah NUG Cozah palai zung onnak kong zong an i ceih i a rauh hlan a fiang te ko lai tiah Saifuddin Abdullah nih a chim fawn. Malaysia cozah nih NUG he ṭha tein pehtlaihnak le biakchawnnak tuah i rianṭuanṭi kan i tim, hi pin cu chimchap dang a ṭha rih lo tiah Malaysia ramleng vuanci Saifuddin Abdullah nih thawnglatu hna sinah a chim. Credit – TCP

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum