Motor lampi he pe 60 hrawng aa hlatnak ah hmunhma lak in SAC ralkap motor pakhat chung ah

Mandalay ramthen, Mogok pengchung ah rallam a sialtu SAC ralkap hna cu Mokok PDF battalion 1221, 1222 le 1223 hna nih nihin August 29 zinglei suimilam 8:00 hrawng ah, Mokok peng Laungsin(လောင့်စင်) le Gwaypin(ဂွေးပင်) khua kar an phanh ah bomb kan chehhnawh hna i kan kah hna, tiah Thabeikkyin(သပိတ်ကျင်း) PDF battalion 1222 nih nihin August 29 ah cathanh an chuah.

 

“Motor lampi he pe 60 hrawng aa hlatnak ah hmunhma lak in SAC ralkap motor pakhat chung ah kutcheh bomb pakhat kan cheh khawh in, bomb(mine) lung 5 kan puah chap hna, cu hnu ah meithal zong in kan kah hna,” tiah battalion 1222 nih cun an thanh.

 

SAC ralkap nih hriamngan in an leh ve hna caah minutes 30 hrawng kahdohnak a chuak, tiah PDF lei nih an langhter. Cu kahdohnak ah cun SAC ralkap 15 hrawng an thi i, tualchung hriamtlai phu lei hliamhma tuar um loin hnu an tolh, tiah theih a si.

Magway Ramthen, Yesakyo Ah PDF Nu Ralkap phu Hna Nih Pyusawhti 6 An Thah Hna! August 29, zinglei suimilam 8:30 ah, Magway ramthen, Yesagyo pumpululh tual pawng ah aa chawkmi SAC kuttang um pyusawhti hruaitu Htun Aung Kyaw le a kuttang um 5 hna cu PDF (nu ralkap phu) nih an kah hna i an paruk ning in an thih leng ah an meithal paruk zong an lak khawh, tiah theih a si.

Mithmutu pakhat nih cun, “Zinglei suimilam 8:30 hrawng ah Yesagyo pumpululh tual pawng dawr pakhat ah phaisa a khawltu pyusawhti Htun Aung le a kuttang mi hna cu, nu 6 thilzuar bantuk in lem a cang mi nih an rak hngah hna i, Htun Aung le a kuttang hna cu an hriamnam he dawr an phak ah nu 6 nih cun an kah colh hna. A kaptu hi nu lawngte an si, pyusawhti pawl cu cawlcang manh loin an thi dih,” tiah a chim.

Cuka dawr ngeitu le thilzuartu hna cu an tlizaam dih i, an kaltakmi dawr le dawr thilri hna cu SAC ralkap nih an khanghpiak dih hna. Yesakyo nichuah lei in SAC ralkap nih hriamngan an thlah caah Chindwin tiva ah lawng in riantuan mi nu pakhat cu kuan nih a hliamh i, a nunnak a liam, tiah tualchung mi nih an chim.

Myittha Tiva Ah SAC Ralkap 3 Cu CDF-KKG Nih An Thah Hna: Magway ramthen, Gangaw peng Myittha tiva chaklei tlang in EPC zung lei ah cycle 2 he ralveng in aa chawk mi SAC ralkap 3 cu kan thah hna, tiah CDF-KKG battalion 5 in chimphuannak nawlngeitu nih media ah a chim.

CDF-KKG nih SAC ralkap ralvengtu hna cu nihnih chung kan bawh hna hnu ah nihin August 29 zinglei ah EPC zung luhnak hauka ah kan kah hna, tiah tuanvo ngeitu nih cun a chim. SAC ralkap hna cu KKG battalion 5, YDF-14 le Htilin chaklei PDF tat-khuai 7 hna i bawm in kan kah hna, tiah CDF-KKG nih cathanh an chuah.
Credit;The Chin Post