Mipi kan ralkap hna cu Mandalay ah 10 Hrawng Cu SAC Ralkap Nih An Tlaih Hna!

Mandalay Ah Hriamtlai Phu Chungtel 10 Hrawng Cu SAC Ralkap Nih An Tlaih Hna!: Mandalay khuachung Myanmar Return Ranger Force phu hruaitu Bu Aung May telh in ralkap 10 hrawng cu Aungmaytasanpeng an umnak inn ah SAC ralkap nih an luhhnawh hna i, August 1 ahkhan an tlaih hna, tiah dohthlennak tuahtu phu pakhat simi Mandalay People Rescue(MPR) nih an thanh. SAC ralkap 50 hrawng nih zinglei ah an tlaih hna, tiah MPR phu chungtel Ko Htat Aung nih RFA ah a chim.

 

“Sangchung ah ruahlopi in zinglei ah SAC ralkap pawl cu an lut i, an tlaihmi hna cu 10 leng an si lai, an min cu tlamtling in theih a si rih lo, inn pakhat chung i an um caah an dihlak in an tlaih hna. A luancia zarh chung ahkhan anmah phu hruaitu pakhat nih a rian Tuan nak ah a phone a philhtak i, cu ruangah atu bantuk in tlaihkhih an tonnak hi a si kho tiah kan zumh” ti in a chim.

 

Tlaih a tongmi hna cu Mandalay Palace ah an kalpi hna i, atu tiang cu pehtlaih khawh an si rih lo, tiah a chimchap. A luancia July 17 ah MPR phu chungtel umnak inn 2 cu SAC ralkap nih an rak luhhnawh caah hriamthil zeimawzat an rak lakpiak hna, tiah MPR phu chungtel hna nih an chim.

 

Relchap,Yangon Ah Mi Pakhat Nih Motor A Zaampi I, Minung 3 A Pah Hna!: Yangon, Shwepitagway CNG dawr ah gas rawn ding in a dirmi YBS-94 motor pakhat cu nihin August 2, zinglei suimilam 3:30 hrawng ah mi pakhat nih an fir i, YBS motor a zaampitu pa nih lampi ah midang motor a pah hna i, kum 12 ngakchia pakhat le midang pahnih nunnak a liam, tiah theih a si.

 

YBS – 94 motor number 2P-7221 cu ShwepitagwayNG dawr ah gas rawn ding in a phanh hnu ah, driver nih motor cu dirter in an hmai dirmi motor pawng i a va kal kar ah aho si theih lo mi pakhat nih a motor cu a zaampi, tiah theih a si.Motor cu an kawl hnu ah lamkam ah meitung i pah in a rak dir cu an hmuh, cu motor nih cun Danginkunglam tonnak ah motor dang zong a rak pah hna, tiah motor khaltu phu nih cathanh an chuah.

 

“Danginkung lam tonnak ah motor i pahnak a chuak i, kum 12 tluk ngakchia pa pakhat telh in minung 3 an nunnak a liam,” tiah motor pah a tong mi hna bawmchantu pakhat nih a chim. YBS Motor a zaampitu cu zuu ri mi a lo, tiah cu thil a cannak pawngkam ummi hna nih an chim.

 

Motor pah a tongmi hna cu Insein siizung ah an kalpi hna i, an chungkhar zong an phan cang ko nain, hliamhma tuarmi le nunnak liammi hna an min le an umnak tak cu fiang in theih a si rih lo. Motor firtu pa cu an tlaih cang, tiah theih a si.Muse Peng Nihnih Chung Kahdohnak Ruang Ah Tualchungmi Pakhat A Thi I, Midang 9 Hliam An Tuar!: Muse peng nihnih chung kahdohnak ruang ah tualchung mi pakhat a thi i, midang 9 hliamhma an tuar, tiah tualchung mi nih an chim.

Credit;The Chin Post