Miphun Le Ram caah anun nak a liam Bawipa tu nih Tantak michungkhar hnem ko hna seh

Karen ramthen, Myait-Wa-Di le Kawkaraih lamthluan, (မြဝတီ-ကော့ကရိတ်အာရှလမ်း) Asia lamcung kahdohnak ah KNU/KNLA pasaltha pakhat cu tuchun ah khan a nunnak liam tiah thawngtheih asi.

 

 

KNU/KNLA le Gya Thit ralkap hna phu fonh nih kawl ralhrang pawl cu Nizan August 18 khan fak ngaiin an kahdoh hna i kawl ralhrang pawl an umnak Kuan Chian Kung, Ryit Kay Htu le AK gate cung ah a ummi Kyun Pyin Kung ralhrang sakhan 355 cu KNU/KNLA le Gyia Thit phu fonh nih an luh hnawh hna hi asi.

 

 

Nizan ah KNU/KNLA nih an kahdoh mi kawl ralhrang hna sakhan le gate pawl hi aren ramthen, Myait-Wa-Di le Kawkaraih lamthluan pawng bakah a ummi an si hna i KNLA le Gya Thit ralkap hna caah tihnung ngaimi an si hna caah nizan zinglei suimilam 5 :40am in tuchun tiang kha faktuk in kahdohnak cu pehzulh in a chuak tiah theih asi.

 

Nizan in tuchun tiang an i kahdohnak ah hin Kawl ralhrang leiin ralbawi telh chih in minung 13 cu an thi cang i hliamtuar cu an tam ngai nain fiang tein theih khawh an si lo tiah an langhter.Cun KNU/KNLA le Gya Thit phu fonh leiin Gya Thit ralbawi cu ralhrang sniper in tuchun ah khan a nunnak liam tiah thawng theih asi.

 

Relchap,AAPP nih August ni 19, tiang cathanh a chuah ning ah Myanmar ramchung huapin SAC ralkap nih nawlngeihnak a laak ni 565 chung ah sualnak ngei lo minung 2,227 thah an si cang, tiah theih a si. Tlaihkhih a tongmi dihlak hi minung 12,064 an si i, an thlah than mi hna 3075 an si,Tlaih ding in nawlchuah mi 15,161 an si. SAC ralkap nih mi nunnak a laak mi hna chung ah Yangon ramthen cu nunnak a liam mi tambiknak a si.

Mi Sawhsawh Bantuk In motor A Cuangmi SAC Ralkap PDF Nih Bomb An Puah Hna I, Ralkap 2 An Thi: Sagaing ramthen, Monywa peng Tasi khua i an sak cuahmah mi thonginn chung in, mi sawhsawh bantuk in a chuakmi SAC ralkap 6 cu nihin August 19, zinglei ah bomb puahhnawh in kan doh hna, tiah Monywa tualchung hriamtlai phu nih cathanh an chuah.

Cu bomb puahnak ruangah cun motor chung ummi SAC ralkap 2 an thi i, midang 3 fak ngai in hliamhma an tuar, tiah an langhter. SAC ralkap pawl cu Monywa peng hriamtlai phufonh nih bomb an puahhnawh hna, tiah theih a si.

Credit The Chin Post