Mino Zeimawzat Cu SAC Ralkap Nih An Tlaih Hna!

Pathein Ah Mino Zeimawzat Cu SAC Ralkap Nih An Tlaih Hna!: Ayarwady ramthen, Pathein ah SAC ralkap nih social media (Facebook) ah dohthlennak kong a taartu mino hna cu an kawl hna i an tlaih hna, tiah tualchung mi nih an chim. SAC kuttang um Pathein pengkulh uktu nih social media in SAC ralkap kuttang um sianginn a kai mi hnahnawhnak a petu PU Social Punishment Admin cu an tlaih lai i, dantatnak kan tuah lai, tiah July 27 ahkhan cathanh an rak chuah.

”PU Social Punishment group Admin kawl ding ah phaisa phalhnak zong an tuah i, nizaan July 28 ah minung 20 hrawng an tlaih cang hna, a tam deuh cu mino an si. Hriamtlai phu hruaitu hna he Facebook ah pehtlaihnak a ngei mi zong an tlaih hna,” tiah Pathein khuami pakhat nih a chim.Tlaihkhih a tongmi mino tam deuh cu an Facebook account hnu zulh in an dawi hna i an tlaih hna, tiah theih a si. SAC ralkap nih nawlngeihnak an laak hnu ah ramkhel lei cataar le lamzawh lio hmanthlak an taarmi hna cu dalan nih an khawmhsuat i, SAC ralkap sin ah thawng an thanh tawn hna caah tlaih an si, tiah khuami nih an chim.

“Atu lio Pathein dirhmun cu thinphang ngai a si, tlaihkhih a tong mi hna zong an min le an kum fiang in theih an si rih lo. Tam deuh cu University kai lio mi, CDM cawlcangnak a tuahtu an si lai, tiah zumh a si. Aho theih lo in SAC ralkap nih mino an tlaih tawn hna nak cu zarhkhat hrawng a si cang,” tiah Pathein khuami pakhat nih a chim.Ayarwady ramthen media hna nih ramkhel lei kong ca an taarmi ah dawhcah lo in comment a tialtu hna cu kherhhlai i, tlaih ding ah SAC ralkap nih timhtuahnnak an ngei, tiah theih a si.

Credit;The Chin post