Mino Le Mipi Nunnak Maw Thantlang Khua Luh Dah

Mino le Mipi Nunnak Maw Atute bak Thantlang Khua luh dah? Asiloah Khuate Him Maw Atute bak Thantlang khua luh dah? Thantlang khua kirtthannak ding kongah ralhrang hna an auhmi meeting ah hlawptlo ngaiim va kai in bia a chim mi kan pa le hna kan in hmuh hna tikah ngaihchia chimpit vansang khi kan si ko. Thantlang khua kirtthannak kong ralhrang va ceihpi le bia va ruah cu.

A kan sehtu Uihrut kha amah sin lila ah ikhamhnak sii (molh lonak sii) va hal he khin ai lo. Amah uihrut lila nih a kan seh mi kha zeithei lo le kan zawn ruat lo mi a uico sin lila ah sii va hal cu khuaruah set ikpaak ko ahcun kan thling tel a zat awk a si. Uihrut sinah ikhamhnak sii va hal usihlaw aseh dah a kan seh chin lo ah kan caah hlawknak a pelte hmanh a um ding a si lo.

Tu kan ram sining le dirhmun ah khin ralhrang telpi le hnatlaknak in Thantlang khuapi hi kirtthan usihlaw a pakhat nak bikah kan mino tampi tlaihkhih kan tong lai, CDM tampi tlaihkhih kan tong lai, kan ralkap hna tampi tlaihkhih kan tong lai, cun kan ralkap nu le pa hna tlaihkhih kan tong lai, cuti tlaihkhih kan ton dingmi thil cu za ah za a fiang ngai mi a si.

Tlaihkhih kan ton rualrual in kan nunnak a liam lai, a siloah lungfim loin a kan tuah lai. Cu dirhmun cu ruahchih a herh. Cucaah mino le mipi nunnak maw atute bak ah Thantlang khua kir tthan dah tiin ka tinak a si. Cu hnuah Than tlang khuapi chung kan lut tthan ti usihlaw khuapi chungah mipi khua kan sak sinin ralhrang sitcawng hi duh zong duh lo zongah Thantlang khuate kip an kal lai a fiang mi a si.

Cuti khuate kip an phanh ahcun a fiang chap rih mi cu khuate um khuasa mipi hranak pek le khuate um inn le lo khangh le hrawk kha sol lo bakin an tuah dingmi a si fawn. Cucaah Thantlang peng chungum Khuate lei him ter maw? Atu bak i a Thantlang khuapi luh hi dah? tiin ka van langhternak a si. Biahleivuangah chap ka duhmi cu kanhnu nai ah.

Thantlang kirtthannak kong aupi dingah kan hruaitu upa hna sinah tonnak nan ngeih dih hnu i biafiang le sining an i fianh dih hnu hna ah. aralhrang auhmi meeting va kai riangmang in hlawptlo ngaiin bia nan va chim mi hi kan hruaitu upa le hna, miphun ah kan pa le a simi hna zei nan rel hna lo bia le nan zomhtaih hna bia a si tiin ka hmuh.Cun chap ka duh rih mi cu.

Thantlang khuate caah bawmhnak thilri phurh zeitlukindah a har tihi atu meeting kaimi nih nan i fian mi a si. Thilri dang vanchim loin nifatin nunnak ca dingah a herh mi facang le cite, chiti koko hmanh phurh a kan sianh lo mi ral hrang he hlawptlo ngaiin bia nai va ruah ko cu ruat setmat ikpak ko ahcun ningtti a si. Kan hnu nai zongah Hakha ah.

INGO pakhat an thilri kha ralhrang nih an tlaih, an timi hna cu Thantlang peng nan phanhter dingahcun kan in pe ti hna lai lo tiah an ti hna. Cu dirhmun a dirmi ralhrang hna he bia nai vai ruah ko cu lungthin a thi kho bak lo.Thil sining dikthlir he chim le phuan ding tampi ka ngei ko nain bia a sau pah cang caah cuvial cun sirih seh. Van Kung Vuanthok (CDMer)