Mindat Chin ramkulh chung ah fak ngai in kahdohnak a chuak biak nak lei pastor te te lo cun ei ding fa cang tirawl kan ipe hna lailo

 

 

Chin ramkulh chung ah fak ngai in kahdohnak a chuahnak hmun Mindat ah zapi eimi facang cu SAC ralkap nih rikhiah in an zuar, tiah tualchung mi nih an chim. Atu tiang ah tualchung mi hna cu Biaknak lei hruaitu hna nih tuanvo an lakpiak hna lawng ah facang cawknak nawl pek an si, tiah Mindat khuami pakhat nih media ah a chim.

 

“Kan herh zat in cawk khawh cu a si ko nain inn ah i chiah cu sianh a si lo. SAC ralkap nih rikhiahnak an tuah i Biakinn chung ah chiah a si. Rawl chumh a herh tik ah Biaknak lei hruaitu pakhat nih tuanvo lakpiak hnu lawng ah an kan thoh piak” tiah a chim. SAC ralkap hna nih cun a luancia August ni 6 in facang tun khat ah Ks. 40,000 in an zuar, tiah a chim chap.

SAC ralkap nih uknak an lak hnu ah CDF-Mindat le SAC ralkap kar kahdohnak a chuah thawk in, Mindat khuachung ah facang telh in zapi nih eimi thilri phorhnak nawl SAC ralkap nih an phih,Kaphnih kar kahdohnak ruang ah Mindat khuachung um mipi 9000 leng cu mah umnak innlo kaltak in ralzaam dirhmun an phan, tiah ralzaam bawmchantu hna nih an chim.

 

CDF- Zotung Nih Mizapi Sin Theihternak Le Ralrin Peknak Cathanh An Chuah,A luancia August 6 ah Zotung hmumram, Nabung khuachung ah a lut mi SAC ralkap 80 cu nihin August 8 ah Nabung khua in an chuak, tiah theih a si. SAC ralkap hna cu Nabung khua in an chuak cang nain Zotung peng Yaungnat Nabung Ramsi Annta Panba le Tayarkun khua hna in ralzam mi hna cu an kir rih lo, tiah theih a si.

 

SAC ralkap umkalnak kong he pehtlai in mi cheukhat nih tualchung hriamtlai phu min bunh in mizapi sin ah thawng dik lo thanhmi kan hmuh caah, an thanhmi thawng dik lo nih mipi humhimnak a hnorsuan ahcun CDF-Zotung nih fakpi in dantatnak kan tuah lai, tiah an thanh.

Curuangah Gangaw-Razua lampi hman rih lo ding in thawng thanhnak kan tuahmi cu zulh ding in le, Zotung hmunram chung i a cangmi kahdohnak le tualchung thawng dik hna cu CDF-Zotung nih thawng thanhnak kan tuah lai, tiah CDF-Zotung nih nihin August 8, ah cathanh an chuah.