MINDAT AH KUM 112 MI RALZAAM NAK AH A NUNNAK LIAM

Lawngtlai, 27 Chiapa 2022 : Mindat ah kum 112 mi upa pakhat cu ralzaamnak ah 27 Chiapa zaanlei ah a nunnak a liam tiah The Mindat Post nih a țial.A nunnak liammi hi Pu Ng’Lo Awm Ghung a si i, a nih hi Cho (Lai) miphun a si. Hlanlio nunphung, bia le hla a theihngal ngaimi zong a si.Pu Ng’Lo Awm Ghung cu Cho ( Lai) nunphung, lupawng, arthlakhen, nam hna aa thlaih pengmi a si, a nih hi Mindat pengah kum upabik a si lai tiah zumh a si.

A nih hi Mindat – Matupi lam pawng khua pakhat mi a si i, an khua cu ralhrang nih an khanghpiak hna hlei ah khua pawngkam ah bomb zong an hmanh taak tiah theih a si.A nih hi mirang chan le Japan chan a rak tong manhmi a si, Myanmar ram nawlngeihnak lak a si hnu ah a hmuhtonmi a chimmi cu ” Mirang chan le Japan channak in a hraang deuhmi a si ” tiah a chim ti’n naihniammi hna nih an chim.Mindat peng ah ralzaam mi eidin, sii-ai chambau ruangah kum upa le ngakchia an nunnak a liam pah lengmang.

Relchap,Khin Oo Peng Ah Hliamtuarmi Ngakchia Pakhat Le Amah Bawmtu Cu SAC Ralkap Nih An Thah Hna!: Sagaing ramthen, Khin Oo peng Myindaung khua ah tang sarih a cawnglio mi ngakchia pa pakhat le midang pakhat amah bawmtu pa cu July 26 zinglei ah SAC ralkap nih an thah hna, tiah tualchung mi nih an chim.Kum 13 tluk si mi Maung Khant Khant Ngein cu ralzaam dirhmun an umnak in, inn lei i a kir lio ah SAC ralkap nih an kah i hliamhma a tuar. Sii-ai i thlop ding in hmun dang i an kal lio ah motor khaltu U Htay, kum 52 he an pahnih in SAC ralkap nih an thah hna, tiah tualchung mi nih an chim.

“Ral an zaamnak hmun in khuachung i a kir lio ah Maung Khant Khant Ngein cu an kah i, a hliamhma thlop ding ah a kalpitu U Htay he Myindaungkhua pawng ah SAC ralkap nih an tlaih hna, an kut hnulei hritem buin an thah hna lengah motor, phone le phaisa zong an an i kalpi,” tiah khuami nih an chim.Myindaung khua cu inn 200 le milu 1000 hrawng umnak khua a si i, a luancia thla thum hrawng in SAC ralkap nih umhmun an rak khuar caah khua mi hna cu a naihnak khua ah an zaam hna, tiah theih a si.