Min Aung Hlaing Nih Nawlngeihnak Thla 6 A Chap Than Lai

Min Aung Hlaing nih a voihnihnak nawlngeihnak cu thla 6 a chap than lainak kong cu SAC ralkap chimphuannak nawlngeitu Zaw Min Htun nih BBC ah a chim.Ram pumpi thimnak dingah daihnak a um khawh nakding ah le thil dangdang tuah a herh rih lai caah nawlngeihnak thla 6 kan chap han lai, tiah a chimchap.

July 31 ah SAC ralkap nih uknak an lak kum khat le cheu a tling lai i, kum khat a tlin hnu in thla 6 nawlngeihnak an chapnak a tlin ni zong a si lai.SAC nih 2021 Febuary 1 in uknak a lak i President cu an tlaih. Vice President Myint Shwe nih rampi thil poipang ton caan(emergency) a si tiah a thanh i, Min Aung Hlaing cu nawlngeihnak a rak pek.

2008 phunghrampi ning in rampi poipang ton caan lioah kum hnih tiang uk khawh a si. Sihmanhsehlaw SAC nih Kaalung(ကာလုံ) auh in thla 6 nawlngeihnak a chap i, 2023 Febuary 1 ah kum hnih a tling lai.2023 August thla ah rampi thimnak ka tuah lai i, teinak a hmumi political party cu nawlngeihnak kan pek lai, tiah SAC ralkap nih thawngpang fianternak an tuah lio ah an chim.

 

Relchap,Sagaing ramthen, Butalinpeng Khawaycinkhua i an khuabawi Khin Maung Myint, a nupi le humhimnak latu Htey Naing cu kan kah thah hna, tiah Guerrilla PDF le Butalin Guerrilla PDF nih cathanh an chuah.July 29 chun sml 12:08 ah Butalin peng, Kawaycin khua khuabawi Khin Maung Myint le a nupi cu kan va thah hna lioah ralkap pa Htey Naing zong kan kah thah ve, an pathum ning tein kan fimhlawm hna, tiah Bo Thein Hnget nih a chim.

 

Khuabawi Khin Maung Myint nih thilri chantu PDF an tlaih hna lioah amah pumpak in a tlaih ve hna. Cu pinah a fapa zong Pyusawhti training a kai ve tiah theih a si.Mon ramkulh, Bilin peng Chaungpiah khuami, Farmland Union Chairman, Pan Sein cu BGF le SAC ralkap thawng a pek hna caah nizan July 29 zan sml 8:40 ah KRF nih kan kah thah, tiah KRF nih cathanh an chuah.

 

Pago ramthen, a hnulei Min Hla peng Sitkywinkhua, Pepintan khua khuabawi Sein Win Maung cu July 29 zing lei ah Zeyar Thaw raltuknak tiah min pek in PDF nih an kah thah, tiah theih a si.Sein Win Maung cu zalong tein duhnak a langhtertu mizapi hna le CDM pawl cu ralkap le palik aa ruaih hna i, a tlaihter hna. Cu pinah, SAC ralkap nih tangka an hmuhnak dingah meiman a khawlh piak hna caah kan thahmi a si, tiah PDF nih an langhter.