Malaysia Hlei Cung in Thlak a Tongmi Ngakchiapa aa Hlau Cang,

Malaysia ram, Kepong khua, Desa Jaya lamton pawng i hlei cung in hringtu pa nih a thlakmi hna ngakchia pathum lak ah sizung ah an chiahmi ngakchiapate cu ICU a umnak in a hun i hlau cang, tiah Malaysia ram Myanmar mibawmtu nih thawng an thanh.

 

Aluancia August 2, zinglei sml. 5:30 hrawng ah khan Thantlang peng, Meisakotla khua (Fartlang) khuami Pu Chohlei nih a fale pathum cu Kepong khua hlei cung in a thlak hna i amah zong a zuang ve,Pu Chohlei le ngakchia pahnih a nunnak a liam i, a hniang bik kum 3 hrawng a simi ngakchia pate hi lamkam hramh cung ah a tla i nun him in a um.

 

Ngakchia pate aa hlauh lecangka in “Ka pa, ka unu le ka upa hmuh ka duh hna,” tiah a nu sin ah a chim,Ngakchia pate hi dam lei a hun panh ngai cang nain hlei cung in a tlaknak ah aa khawnmi a hnak, a lu le a kee hi thlopbul rih an hau, tiah mibawmtu nih thawngthanhnak an tuah.

 

Relchap,Chin Ramkulh, dohthlennak a tuahtu hriamtlai phu pakhat a si mi Zomi Federal Union (PDF-Zoland) nih hlawhtling tein raltuknak Drone kan ser, tiah August 9 ah khan an thanh. A rihzan 12kg in 15kg tiang a phur kho mi a si i, budget a tlawm ruang le battery lei tlamtlin lo ruang ah meng 9 tiang a zuang kho, tiah PDF Zoland in chimphuannak nawlngeitu pakhat nih a chim.

 

Drone sernak ah phaisa a dihmi cu Drone a hmetngan cung ah aa hngat. A cawk in cawk ah cun 15kg a phurkhomi hi Ks. sing 90 in sing 100 kar a dih tawn nain kanmah tein kan ser caah sing 20 lawng kan dih, tiah PDF Zoland in ralkap pakhat nih a chim. ZFU/ PDF Zoland Engineering & Innovation in, Mi ngiathlainak Drone, Raltuknak Drone le Thilphurhnak Drone tiin phunthum an serchuah cang i, hriamtlaitu dang sin zong ah bawmhnak an pek cang hna, tiah theih a si.

 

Meng 100, 400 le 500 tiang a zuang i a rak kir than khomi zong kan serthiam ko nain budget lei kan tlamtlin rih lo ruangah atu bantuk in kan budget he aa tlakning in meng 9 tiang a zuang kho mi lawng kan serchuah rih, tiah PDF Zoland in chimphuannak nawlngeitu nih cun a chim chap.
Credit;The Chin Post