Lei kuang chung thil a cing mi khuami 4 hna cu SAC ralhrang nih an rian nak hmun meithal in an kah hna,

Khin U peng ah Lei kuang chung thil cing mi khuami 4 hna cu SAC ralhrang kuttang Pyo Saw Htee nih meithal in an kah hna caah minung 2 an thi tiah theih a si.Sagaing ramtthen Khin U peng Myin khua ah tualchung mi 4 hna cu Leikuang ah facang cing ding in fangci an timh lamh lio ah SAC ralhrang kuttang um mi Pyo Saw Htee hna nih meithal in an kah hna caah minung 2 an nunnak a liam tiah theih a si, Tuchun Hniang 6 ni chung sml 11:00am hrawng ah meithal in an kah hna hi a si, minung 2 cu an zaam kho tiah theih a si.

 

 

“Minung cu an zaam, a zaam kho lo mi pakhat cu an tlaih i a calpadar ah meithal in an kah, a dang pakhat cu an kah nain a thi colh lo, a zaam pah, an kah tthan a zaam kho ti lo i cu hmun ah a nunnak a liam ve” tiah Khin U Dynamite Squad nih an langhter,A thi mi pakhat cu CDM a tuah tu Sayama i a pa a si tiah an chim, a dang hi aho si kan thei rih hna lo tiah a langhter chap.

 

 

Relchap, Kanpetlet Ah Zung Riantuan CDM Hna Ca ah Sianghleirun Pakhat He Pehtlaihnak Tuah In Training An Tuah Lai:: Chin ramkulh, Kanpetlet khua ah CDM hna ca ah ramkhel le chawlehthalnak kong telh in subject 10 leng cu ramchung sianghleirun pakhat he pehtlaihnak tuah in cawnnak(training) kan tuah lai. Cu cawnnak ah kai ve cio ding in Kanpetlet mizapi uknak nih cathanh an chuah.

 

 

“Kan Chinram cu Myanmar ramchung ah zei lei poh in a thangcho lo bik ramkulh a si. Fimcawnnak lei zong ah a der bik le a thangcho lo bik kan si. Sianginn hun hmanh ah a kai ding a um lo tluk kan si. Tanghra a awngmi zong kan tlawmte. Kan ram sersiam Thannak ah Federal phung ning in kan tuan le tuanvo kan laak a hau,” tiah uanvo ngeitu nih a chim.

 

Ramkhel, chawlehthalnak, khuakhan lairel thiamnak, Mirang ca, Federal kongkau le ukhruainak subject hna hi a tam deuh cu an i thim i an cawng lai, tiah an langhter,CDMers, caan karlak mizapi ukhruainak ah aa telmi hna le internet line a hmang khomi hna lawng nih August 8 tiang khi a hnu bik caan khiah in pehtlaih khawh kan si. Cun, Kan cawnmi hi cawn sawhsawh si loin atak in dohthlennak le caan karlak ukhruainak ca ah kan hman lai, tiah an thanh.
Credit;Th e Chin Post