Khin Oo Ah SAC Ralkap Nih Kum 13 Ngakchia Pa Le LPDF Hruaitu An Thah Hna

Sagaing ramthen, Khin Oo peng ah SAC ralkap nih kum 13 ngakchia pa, Khant Khant Ngein cu an kah caah hliamhma a pu i, sii-inn ah an kalpi lioah motor cungin luti hor ah an hlonh i an thah. Amah phortu PDF hruaitu pa zong SAC ralkap nih an thah, tiah tualchung mi hna nih an chim.Sagaing ramthen, Khin Oo peng Makyioh) khua ah SAC ralkap pawl nih July 26 zing sml 8:00 hrawng ah meithal an puah i, an lut. Cun,

Kum 13 ngakchia pa Khant Khant Ngein a ban ah an kah, tiah Khin Oo peng thawngpang fianternak phu sinin theih a si.Hliamhma pumi ngakchia pa cu LPDF hruaitu nih sii-inn a kalpi lioah lam tantim ah SAC ralkap he an i tong. LPDF hruaitu cu meithal in an kah i a thi. Ngakchia pa cu luti hor ah an hlonh i a thi chuakmi a tam tuk caah a nunnak liam, tiah theih a si.

Ngakchia pa ruak va char awk ah a nule pa cu motor in an kal i, SAC ralkap he an i ton tikah ralkap nih ngakchia pa a nu a sui hna cu an chuh pinah an tuk an velh i, an motor zong an lakpiak hna.“SAC ralkap rallam an sial caan paoh ah mizapi nih lengchuah i nan i ralrin a hau. Ralkap he aa hlatnak ah nan um lai. A nunnak liammi LPDF hruaitu zong raltha tein mi a khamh caah upatnak salaam kan pek,” tiah KURDAF tuanvo ngeitu nih Khit Thit Media ah a chim.

Relchap,SAC ralkap nih thih dan a pek hna i, a thahmi hna Jimmy, Phyo ZeYa Thaw, Hla Myo Aung le Aung Thura Zaw hna he pehtlai in tangti phu thum nih July 27 ah cathanh an chuah.Thih dan an pek hna ruangah ramchung buainak a zual chinchin lai caah SAC nih nih a dihlak in tuanvo a lak lai, tiah tangti phumthum a si mi MNDAA၊ TNLA ၊ AA nih July 27 ah an langhter.

SAC nih sualnak ngan a si lomi le ramkhel kong ah amah he lung aa khat lomi minung hna a thahmi hna hi mizapi kan thinhunnak le ramchung buainak a zualter lai, tiah cathanh an chuah.Cu pinah SAC minung pali an thahmi hna cungah tangti phu thum nih kan duh hrimhrim lo. Tantakmi chungkhar nan ngaihchiatnak kan i hrawm, tiah an langhter

Credit;The Chin post