Kan mipi ralkap nih Kalaymyo kahdohnak ah SAC ralkap 10 an thi pin hliam zei ma zat tuar,

Nihin August 8, Sagaing ramthen, Kalaymyo kahdohnak ah SAC ralkap 10 an thi, tiah Kalay PDF chungtel pakhat nih a chim. Kalaymyo peng Kyunchaung le Tharyarkone khua karlak ah nihin chun suimilam 12:30 hrawng ahkhan kaphnih kar kahdohnak a chuak, tiah theih a si,SAC ralkap 20 hrawng an rat lio ah tualchung hriamtlai phu nih rak bawh in an kah hna. Kaphnih kar kahdohnak suimilam pakhat hrawng a rauh hnu ah SAC ralkap lei 10 hrawng an thi i, tualchung hriamtlai phu lei hliamhma tuar um lo in hnu an tolh kho, tiah a chim chap.

 

A luancia August 3 ahkhan Tharyarkone khua pawng ah fak ngai in kahdohnak a rak chuak. Cu kahdohnak ah cun SAC ralkap 25 hrawng an thi i, hliamhma tuar zong an tam, tiah Kalay PDF nih cathanh an rak chuah. Cu kahdohnak ah cun Kalay PDF battalion 6 in t-sait-hmu Natchaung PDF battalion 1 in duh-tat-yin-hnu le sen-ta-ri cawngtu pakhat ti in tualchung ralkap 3 an nunnak a liam.

 

Butalin Peng Ah SAC Ralkap Bomb Puahhnawh An Ton caah Ralkap 5 An Thi: Sagaing Ramthen, ButalinPeng ah SAC Ralkap pawl cu PDF nih voi hnih bomb an puahhnawh hna i, ralkap 5 an thi, tiah Aung San Generation (A.S.G) nih August ni 7 ah cathanh an chuah. August 7, zing suimilam 7 hrawng ah Butalin peng Zeetawkhua Sianginn hmai dawr pakhat ah PDF lemcang in thil a rak cawmi SAC ralkap pahnih cu Aung San Generation phu he an i tong i, SAC ralkap pahnih nih cun meithal puah in an hawile theihternak an tuah hna caah sianginn chung ah a um mi SAC ralkap pawl nih an kah hna hnu in kahdohnak a chuak, tiah theih a si.

 

Cu kahdohnak ah cun minung thazaang le hriamnam aa thlau tuk ruang ah tualchung hriamtlai phu lei cu hnu an tolh than, tiah theih a si. Cu hnu ah SAC ralkap pawl cu Poekone khualei ah rallam an sial i, Aung San Generation pawl nih cun bomb an puahhnawh hna. Bomb puahnak ah cun SAC ralkap 4 an thi. Cu hnu ah Butalin lam ah bomb an puahhnawh than hna i SAC ralkap pakhat a thi than, tiah Aung San Generation nih an cathanh ah an langhter, Aung San Generation nih cun SAC ralkap an tukdohnak ah hriamnam an chambau ngai caah, an cathanh ah cun mipi sin bawmhhalnak zong an tuah.
Credit;The ChinPost