Kalaymyo Lei Ah A Kalmi SAC Ralkap Cu Tualchung Hriamtlai Phu Nih Bomb Puahhnawh Hna,

Tamu in Kalaymyo Lei Ah A Kalmi SAC Ralkap Cu Tualchung Hriamtlai Phu Nih Bomb Puahhnawh Hna I, Ralkap 50 An Thi!: Sagaing ramthen, Tamu in Kalaymyo lei ah bomb thianhhlimh ding in a kalmi SAC ralkap motor 10 cu Tualchung hriamtlai phufonh nih bomb an puahhnawh hna caah SAC ralkap 50 hrawng an thi i, 10 hrawng cu fak ngai in hliamhma an tuar, tiah CDF – Tonzaang nih cathanh an chuah.

 

SAC ralkap motor run cu Tamu le Kaalymyo kar Mengtung 55 pawng ah KPDF, CDF-Tonzang le PDF-Yazagyo phu nih pa-de-ta bomb lung 30 an puahhnawh hna, tiah theih a si. Kalaymyo lei ah mithi phor motor le mizaw phor motor hna cu chun hnu suimilam 1:30 hrawng ah an phan, tiah Kalaymyo khuasa mi hna nih an chim.

 

Mandalay Ramthen, Madaya Peng Khuabawi Cu Hriamtlaitu Pahnih Nih An Kahthah: Mandalay ramthen Madaya peng khuabawipa cu nihin August ni 5 ah hriamtlaitu mi pahnih nih an thah, tiah tualchungmi sin in theih a si. Khuabawi U Khin Zaw cu aho theih lo mi hriamtlaitu minung pahnih nih Pistol in voi 4 an kah i a thi, tiah theih a si.

 

“SAC kut tang ah khuabawi rian tuan lo ding in tualchung hriamtlai phu lei nih nawl an rak pek cang,” tiah khuami pakhat nih cun a chim. Khuami pakhat nih cun, “Zeiban tuk hriamtlai phu nih dah khuabawi pa cu an thah ti fiang in theih a si rih lo. SAC ralkap nih khua pawnghrawng ah chekhlatnak an tuah,” tiah a chim chap.Mandalay ramthen Madaya peng ah hin a luancia July thlachung ahkhan SAC ralkap rian khinhmi a tuantupakhat cu thah a ton ruangah tualchungmi 50 leng SAC ralkap nih an rak tlaih bal cang hna.

Matupi Ah Kum 70 tluk Upa Pakhat Cu SAC Ralkap Nih An Tlaih!Chin ramkulh, Matupi ah a ummi Pu Thein Min, kum 70 cu SAC ralkap nih nizaan August 3 ah an tlaih, tiah sangchung ummi nih an chim.Pu Thein Min tlaih a tonnak a ruang cu theih a si rih lo. Pu Thein Min cu 2010 in 2015 tiang khuatlang hruaitu tuanvo a rak latu pakhat a si, tiah khuami nih an chim.