Kahdohnak Ah SAC Ralkap 38 An Thi I, PDF 3 Nunnak A Liam Thawngpang Dang,

Magway ramThen, Myine peng, Dwinmakhua pyusawhti sakhan cu PDF phufonh nih an kah caah SAC ralkap 38 an thi i, PDF in ralkap 3 nunnak a liam, tiah Myine tualchung hriamtlai phu nih cathanh an chuah.August 6, zinglei suimilam 5:25 ah SAC ralkap phu hna cu Myine peng tualchung hriamtlai phu battalion 1 hruainak in Pakokko peng hriamtlai phu PPDF, Mupian hriamtlai phu, Pung Taung Ngyi Nawngphu, Magway PDF, West Ayeyar Guerilla Force le Zarmanipah-kah-phah phufonh hna nih an kahdoh hna, tiah theih a si,Kahdohnak ah SAC ralkap 34 cu an thi colh. SAC ralkap lei bawmtu ding in cycle 7 he a kalmi SAC ralkap hna cu lampi ah bomb puahhnawh an ton Than caah cycle 3 cu i hlonh in an tlau, a dang cycle 4 cu an zaam hna, tiah theih a si.

 

Dwinmakhua SAC ralkap sakhan cu lak ding in timhtuah a si nain, SAC ralkap lei bawmtu an ra i, vanlei kahdohnak an tuah caah tualchung hriamtlai phu lei hnu an tolh Than. Kahdohnak ah tualchung hriamtlai phu lei in ralkap 3 nunnak a liam i, midang 5 nih hliamhma an tuar, an hliamhma kong ah thinphan ding a um lo, tiah theih a si. Cu kahdohnak ah cun SAC ralkap lei in pyusawhti hruaitu, Pakokko khah-lah-yiah 259 chungtel ralkap 5 telh in SAC ralkap 38 an thi i, hliamhma tuarmi 27 cu Pakkoko siizung ah an chiah hna, tiah theih a si.

 

Tualchung ralkap le SAC ralkap hna cu zinglei suimilam 5:27 in zinglei suimilam 6:41 tiang an i kap. Myine tualchung hriamtlai phu nih cun, “Kahdohnak chung ah kan dihmi hi Kyats sing 800 man hrawng a si, mipi bawmhnak thawng in kahdohnak kan tuah khawh caah mizapi nih kan bawm cio hram ko uh,” tiah cathanh an chuahCun, Sagaing ramThen, Butalin peng, Butalin-Monywa motor lampi ah nizan August 7, zinglei suimilam 5:00 ah SAC ralkap le Kanawnghriamtlai phu kar ah hmun hnih in kahdohnak a chuak i, kahdohnak ah SAC ralkap 5 an thi, tiah Kanawng tualchung hriamtlai phu in Tuanvo ngeitu nih a chim.

 

Demoso Peng Sanpiah Khua Ah Bomb I Lamhnak In SAC Ralkap 4 An Thi: Karenni ramkulh, Demoso peng Sanpiah khua pawng ah umhmun a khuarmi SAC ralkap hna cu August 5 i rallam an sialnak ah bomb lamhsualnak in ralkap 4 an thi, tiah KPDF nih cathanh an chuah,Bomb i lamhsualnak in a thimi SAC ralkap ruak a chartu hna cu tualchung hriamtlai phu nih 60 mm in an kah than hna caah SAC ralkap hliamhma tuar mi an tam, tiah kPDF nih an thanh, Sanpiah khua Khrihfa Biakinn chung i umhmun a khuarmi SAC ralkap hna cu KPDF le tualchung hriamtlai phufonh nih an kah hna caah kaphnih kar kahdohnak minutes 30 hrawng a chuak, tiah KPDF nih August 6 ah an thanh.

Monywa-Mandalay Lampi Ah SAC Ralkap Pawl Cu PDF Nih Bomb An Puahhnawh Hna I, Ralkap 20 Leng An Thi: Sagaing ramthen, Myinmu peng Monywa-Mandalay lampi ah bomb thianhhlimh ding ah hmun thum in a kalmi SAC ralkap hna cu bomb kan puahhnawh hna caah SAC ralkap 20 leng an thi, tiah Farmers Revolution Force nih cathanh an chuah.

August 6, zinglei suimilam 6:34 hrawng ah Monywa – Mandalay lampi, Chaung U – Myinmu lam ah SAC ralkap pawl cu hmun thum in rallam an sial i bomb thianhhlimhnak an tuah, tiah theih a si,SAC ralkap hna cu Farmers Revolution Force battalion le MRA Sagaing pengkomh battalion 5 phufonh nih an doh hna. Tualchung hriamtlai phu lei cu hliamhma tuar um loin hnu an tolh nain an cycle an kaltak i, SAC ralkap nih tualchung mi pakhat an tlaih, tiah theih a si.

Taze Khuachung Ah Palik Motor Cu PDF Nih An Hna Caah SAC Ralkap 7 An Thi I Hriamthil Zeimawzat An Laak: Sagaing ramThen, Taze khuachung check gate pawng ah ralvengtu palik motor cu Shwebo pengkomh battalion 25 le pengkulh pah-kah-phah phufonh nih nizan August 7, zinglei suimilam 5:30 ah an kah hna. Motor chung cuangmi palik 7 cu an thi i, G-3 meithal 6 an lakpiak hna, tiah theih a si.

“Palik motor ralveng ding in aa chawk mi cu check gate pawng an phak ah timhcia tein a rak bawhtu tualchung hriamtlai phu nih an kah hna i, motor chung cuangmi palik cu an dihlak in an thi, an hriamthil zong an lakpiak,” tiah Taze hriamtlai phu he naihniam in a ummi pakhat nih a chim. Taze peng, Byaitkyi khua ah SAC ralkap hna cu Taze PDF phufonh nih August 4 ahkhan an rak kah hna caah SAC ralkap 10 hrawng an thi i, kuan le bomb zong an rak lakpiak hna, tiah theih a si.

Yangon RamThen In Zarhkhat Chung ah Khuabawi 6 Thah An Tong I, 3 Hliam An Tuar: Yangon ramThen, pengkulh cheukhat ah August 1 in August 7 tiang ah khuabawi 6 thah an tong i, 3 hliam an tuar tiah theih a si. Insein peng, Aungsan sang ah a ummi khuabawi U Tin Maung Naing le a nupi Daw Ti Ti Thein hna cu August 6 zaan ahkhan kah an ton caah an nupi cu a thi i, khuabawi pa cu hliam a tuar, tiah sangchung ummi pakhat nih a chim,A luancia August 4, chun hnu zong ahkhan Pingnekung sang khuabawi U Myo Ngunt Aung cu meithal kahnak in a thi.

August 2 lio zong ah khan Mingalardung peng Shwenantakhuabawi U Win Naing Htun le a nupi Daw Hae Ma Lwin cu an nupa in an rak kahthah hna. Kuanchainkung peng Aungmingalar khua ah inn 10 uktu U Myo Min Khaui zong meithal kahnak in a thi, tiah theih a si,Yangon, Insein, Twintae Mingalardung, South Dagon, Kuanchainkungle Taketa peng ah August 1 in August 7 ting ah khuabawi 6 thah an tong i, khuabawi 1 le inn za uktu pakhat, inn hra uktu pakhat tiin minung 3 hliam an pu, tiah tualchung mi nih an chim.

Credit;The Chin Post