Kah Dohnak Ah Thawng Thei Fiang A Si

Kahdohnak voi 4 a chuak i ralhrang lei in 34 an thi 20 nak tlawmlo nih hliam an tuar. 1-9 BIANGREITHLEP CHINRAM KAHDOHNAK AH RALHRANG 60 LENG AN THI CHINLAND RALKAP 8 AN NUNNAK LIAM. Lawngtlai, 13 Biangreithlep 2022 : 1. Chinland ralkap cawlcanghnak hmun ah ralhrang le Chinland ralkap CNA, CDF Thantlang, CDF Zophei, CNDF hna i fonh in 3-5 Biangreithlep 2022 ah kahdohnak voi 4 a chuak i ralhrang lei in 34 an thi 20 nak tlawmlo nih hliam an tuar.

Kahdohnak a chuahnak hmun hi Hakha le Falam kar motor lamcung Ramthlo, Tlangzar, Țaal kar ah a si i, Hakha in Kalay lei ah kal a timmi motor 27, tank 2 ( minung thazaang 15) ralhrang cu mizapi ralkap fonh nih an kah hna. Ralhrang nih ramkhel thongtla (15) hna cu ralphaw ah an hman hna hlei ah Ramthlo khua inn (10) Tlangzar khua UPC biakinn telh in inn (16) an khangh.9 Biangreithlep 2022 ah Falam in Kalay lei ah an kal than i CNDF nih bomb in an puah hna i ralhrang (4) an thi.

Chin ramkulh Matupi in Mindat lei ah a thawhmi ralhrang cu 7-8 Biangreithlep ah CDF Mindat nih mengtung (13, 17, 18) ah voithum an kah hna i ralhrang 30 tlawmlo an thi hliamtuar mi an tam. 3 – 6 Biangreithlep tiang Hakha-Falam kar kahdohnak ah Chin National Army (4) CDF-Thantlang in (4) nih miphun le ram caah an nunnak an pek.Crd-The Lai Ram Times

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum