Kah Dohnak Ah PDF Lei A Thimi An Um

Kalay-PDF le SAC Ralkap Kahdohnak Ah PDF-Kalay In Minung 3 An Nunnak A Liam. Sagaing ramṭhen, Kalaymyo nitlak thlanglei ah um mi PDF-Kalay battalion 3 sakhan cu nizaan April 12 zinglei suimilam 9:30 ah SAC ralkap minung thazaang 150 he an luhhnawh hna caah kahdohnak a chuak. Cu kahdohnak ah cun mizapi vengtu ralkap pakhat a nunnak a liam, sakhan kam i hmanh mi bomb a puah ruangah SAC ralkap tamlak an thi lai, tiah PDF-Kalay nih an thanh.

SAC ralkap nih hriamngan he pehtlai in an kah hna hnu ah cu sakhan ah cun an lut i, hriam thazaang aa thlau tuk caah PDF-Kalay battalion 3 nih cun an sakhan cu an chuahtak, tiah theih a si. Kalaymyo nitlak thlanglei Pyidawta khua lei ah SAC ralkap minung thazaang 300 hrawng nih rallam hmunhnih in an sial i, nihin April 13 zinglei suimilam 10:00 hrawng ah PDF-Kalay, Zomi PDF, PDA, CNDF, CDM-Siyin, pah-kah-phah phufonh hna he an i kap. Chunhnu suimilam 3:00 tiang fak ngai in an i kap i, cu kahdohnak ah cun PDF-Kalay in minung 3 an nunnak a liam. SAC ralkap lei in a tlawmbik minung 5 an thi ve lai, tiah PDF-Kalay nih an thanh.

Cun Kalaymyo khuachung ah nizaan zaanlei le nihin April 13 zaanlei suimilam 6:00 hrawng ah SAC ralkap le tualchung hriamtlai phu kahdohnak a chuak, tiah khua mi nih an chim. Khuachung kahdohnak a chuahnak hmun cu Tahan sang ah a si i, Kalaymyo vanlawng tual pawng in kahdohnak a chuahnak hmunhma cu SAC ralkap nih hriamngan in an kahbawmh hna, tiah theih a si, cu kahdohnak ah kaphnih a thi mi le hliamtuar kong ah fehternak a um rih lo.

Yangon Le Pago Kar Ah Kahdohnak A Chuak I SAC Ralkap 10 An Thi: Yangon ramṭhen le Pago ramṭhen karlak ah a um mi SAC ralkap checkgate pakhat cu PDF nih an kah i SAC ralkap 10 an thi, tiah theih a si. Ramṭhen 2 kar Zuaitun(ဇွဲတွန်) checkgate cu nizaan April 12 zing Sml 11 hrawng ah Khayan PDF le Pago pengṭhen batallion 1 Kawa(ကဝ) PDF i bawm in an kah hna, tiah Pago ramthen PDF in rianngeitu nih a chim.

“Minutes 40 fai kaphnih in kan i kap i Kahdohnak thawng kan hlat cuahmah lio a si. SAC ralkap 10 an thi i 3 hliam fak an tuar ti tiang lawng kan theih rih,” tiah a chim chap. Pago pengṭhen PDF nih nihin April 13 zinglei Sml 2 hrawng ah Ngaunglaypin peng Gyugiakone(ကြိုးကြာကွင်း) le Letpanpuh(လက်ပံပု) kar ah ral a veng mi SAC ralkap motor cu kutcheh bomb in an doh hna i SAC ralkap hliam a tuar mi an um, tiah theih a si.  Crd – TCP

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum