Japan Ram Ah Covid Zawtnak Omicron BA.5 Variant Aa Chawnh Mi 100,000 Leng An Um Cang;

Japan Ram Ah Covid Zawtnak Omicron BA.5 Variant Aa Chawnh Mi 100,000 Leng An Um Cang! Japan ram ah Covid -19 zawtnak aa chawnh mi zat cu July 15 tiang ahkhan minung 100,000 leng an um cang, tiah tuanvo ngeitu hna nih an chim. Hihi tukum February thla hnu ah a tam bik an phanh a si i, a luancia kum nakin a let hnih in zawtnak aa chawnh mi an tam deoh. Cu lakah cheunga cheukhat (1/5) cu Tokyo khualipi ummi an si.

 

A luancia zarh khan zawtnak aa chawnh mi an karh khun i, hi boruak kong ahhin lungrethei ngai a si, tiah ngandamnak lei ṭuanvo ngeitu nih an chim. Zawtnak aa chawnh mi an tam khun nak cu, chawnh a fawi tuk mi Omicron BA.5 ruangah a si, tiah thiamsang hna nih an chim.

 

Covid khamnak ding ahhin ramchung ah zulh ding phung thar tete an ser i sii tha deoh mi chuah khawh nakding kan i zuam lai, tiah Prime Minister Fumio Kishida nih a chim. Atu hi a voi 4 nak Covid-19 raikhamsii chunh ding in Japan cozah nih timhtuahnak a ngei i, ramri luhchuahnak kong ah cun atu tiang an an dinhdorh mi a um rih lo.

Credit; The Chin Post

Hpakanh Ah KIA Le SAC Ralkap Faak Ngai In An I Kap I, SAC Ralkap 25 An Thi!: Kachin ramkulh, Hpakanh peng Saezin ah KIA le SAC ralkap hna cu July 16 zinglei suimilam 7:00 hrawng in July 17 zinglei tiang faak ngai in an i kap i cu kahdohnak ah cun SAC ralkap lei 25 nak tlawm lo an thi lai, tiah tualchung mi nih an chim. Kaphnih kahdohnak ah SAC ralkap lei a thimi an tam caah nihin July 17 zinglei suimilam 8:00 tiang SAC ralkap nih raltuknak vanlawng hmang in kahdohnak an tuah, tiah theih a si.

 

“Kahdohnak cu nizaan July 16, zinglei suimilam 7:00 hrawng in Saezin khua he mengkhat tluk aa hlatnak ah a chuak i SAC ralkap lei a thimi an tam i, nihin July 17, zinglei tiang i kahnak thawng theih a si. Raltuknak vanlawng hmang in voithum tiang bomb an thlak, raltuknak vanlawng a kir hnu tiang ah kahdohnak a dai rih lo. Nihin zinglei tiang ah SAC ralkap lei 25 hrawng an thi cang,” tiah tualchung mi pakhat nih a chim.

 

 

Myinchain-NuaHṭukyi Lamcung Ah SAC Ralkap Motor Pakhat Bomb Puahhnawh A Si I, Ralkap 2 An Thi!: Mandalay ramṭhen, Myinchain-NuaHṭuakyi lampi ah nihin July 17, tuzinglei suimilam 11 hrawng ahkhan NuaHṭukyi lei ah a kalmi, SAC ralkap 10 hrawng nih zulhmi motor hme pakhat cu bomb puahhnawh a ton caah, a chung cuangmi SAC ralkap 2 an thi, tiah NuaHṭukyi PDF nih an thanh.