Inn 400 hrawng khuasaknak ah SAC ralkap nih inn 40 hrawng cu an khangh leng ah

Magway ramthen, Pauk peng, Chaingzauk khua cu nihin August 16 zinglei ah SAC ralkap nih an khangh caah inn 40 hrawng a kaang, tiah tualchung mi nih an chim,Minung thazaang 100 leng he rallam sialtu SAC ralkap hna nih August 15 zaanlei ah Chaingzauk khua cu luh hnawh  in phungki sianginn ah umhmun an khuar. Nihin August 16 zinglei ah cu ralkap hna nih cun inn an khangh, tiah Chaingzauk khuami pakhat nih a chim,Khuami pakhat nih cun, “Inn 400 hrawng khuasaknak ah SAC ralkap nih inn 40 hrawng cu an khangh leng ah Chaingzauk khua pawngkam zong ah inn an khangh, inn zeizat an khangh bel fehter awk a tha rih lo,” tiah a chim.

 

Nizaan August 15 ah SAC ralkap le tualchung hriamtlai phu hna cu Chaingzaukkhua pawng ah an i kap, tiah khuami nih an chim. SAC ralkap hna nih rallam an sial ti kan theih cangka in a himnak hmun ah kan zaam dih hna, tiah an chim chap,Magway ramthen chung ah SAC ralkap nih February 1 in May 31 tiang ah inn 3,055 an khangh. Rampi huap in SAC ralkap nih an khanghmi inn dihlak hi inn 18,886 a si cang, tiah Data For Myanmar nih June 7 ah a rak thanh.

 

Relchap;SAC kuttang biaceih zung nih Aung San Suu Kyi cu thong kumruk an chap mi kong ah EU nih cun tlukruannak le dikfelnak a um lo mi a si, tiah an mawhchiat i, Daw Aung San Suu Kyi cu a rannak in thlah ding in EU nih SAC cu a nawl, tiah theih a si.

 

 

Daw Aung San Suu Kyi thong kumruk an chap mi kong ah High Representative of the European Union for Foreign Affairs and Security Policy Josep Borrell nih cun a lungtlin lonak twitter ah a tial,SAC nih Myanmar mizapi duhnak cu a biapi ah chiahpiak in Daw Aung San Suu Kyi telh in ramkhel thongthla vialte cu chuah dih ding in a duhnak kong Josep Borrell nih cun a chim.

Kum 77 a si cangmi Daw Aung San Suu Kyi cu SAC nih uknak an lak hnu in Case 19 in tazacuai a si i cu chung ah Daw Khin Kyi Foundation pehtlai in tazacuai mi case in nizan August 15 ah thong kumruk an rak chap. A luancia July thla tiang ah case 11 bia ceihpiak a si cang i, case 11 ah 17 thong thlak ding in bia khiahpiak a si.
Credit;The Chin Post