India ram, Mizoram ramkulh, Kolasib khua chung ah 2.7kg a ritmi, rupees sing 1,340 man bing(kyats sing 40,000) cu Myanmar rammi

India ram, Mizoram ramkulh, Kolasib khua chung ah 2.7kg a ritmi, rupees sing 1,340 man bing(kyats sing 40,000) cu Myanmar rammi pahnih sin in motor pakhat chung ah Mizoram palik le rithaisii a dohtu phu nih nizan August 22 ah an tlaih, tiah theih a si.Tlaih a tongmi pahnih hi Tedim peng Bukphir khuami Lalthangliana, kum 44 le Khual Sawm Sang an si. An pahnih in Aizawl khuapi um, rithaisii a dohtu zung nih taza an cuai hna, tiah theih a si.

Relchap,Sagaing ramthen, Yinmarbin peng Winkone khua pawng ah August 21 zanlei sml 2:00 hrawng in SAC ralkap le PDF kahdohnak a chuak, tiah theih a si. Cu kahdohnak ah cun SAC ralkap 4 an thi i, PDF ralkap 1 a nunnak a liam ve, tiah Yinmarbin pengkomh Battalion 1 in tuanvo ngeitu pakhat nih a chim.

 

“SAC ralkap pawl cu Winkone khua in an chuah ah kan kah hna i, Sml pakhat leng kahdohnak a chuak. Kaphnih in hriamngan he hriamhme in kan i kap i, kan mithmuh ah SAC ralkap a thimi hi 4 an si. Kanmah lei in ralkap 1 a nunnak a liam ve,” tiah a chim chap.

Cu kahdohnak ah cun Yinmarbin Battalion 1, Alpha Special Force le Kani-Yinmarbin tangti phu hna i bawm in an kah hna, tiah theih a si,SAC ralkap nih Winkone khuami ralzam Chit Win cu meithal in an kah thah. Cu pin ah SAC ralkap nih hmunhma thianhhlimnak an tuah ruangah Winkone, Kyat, Talauk, Paukinnmyaing le Thityapin khuami a thong leng an zaam, tiah theih a si.
Credit;The Chin Post