I Ralring Ko U Nan Thluak Leh An Timh Hna Hih

Rul cu rul a si ko, khuasik lakah a thi dengmangmi rul khi va hlawm law a thi sual lai tiah lum tein va chia hmanh, a cawlcangh khawh bakin an cuk colh ko lai.” Ram le miphun caah tiin hriamnam a tlaimi nan si ah siseh, biaknak lei Khrihfabu hruaitu pastor te nan si ah siseh, ramchung mipi nan si ah siseh atu lio kan dohmi cu ai khat dih. Cucu ralhrang uknak a tlak le a dih dingmi hi a si.

Caan zei maw zat a kal cangmi chungah ralhrang phu nih an duhning le an i timhning bantukin rian an țuan kho ti lo i an lohma a kal kho ti lo. Hmun kip ah tlangcung hriam tlai le CDF/PDF he an i kap peng i ralhrang lei minung tampi an thi cang. Atu cu furpi a si i ruahhang a tam lio a si ruangah an duhning in an cawlcang kho ti lo. Cucaah daihnak.

kah daihnak an serpi hna lai i kam khat leiin khuanu khuapa le Khrihfabu hruaitu pastor te kha nan lungton an i zuam lai. Khuanu khuapa le pastor te hna hmang in zeitindah mipi nih an kan duh lai i an kan cohlan lai ti kha an ruah lio caan a si. Cuticun kap hnih lungtlinnak le daihnak an in tuahpi hna lai i hruaitu lungton hmasa kha hehchat an i zuam lai.

Cu lio ah cun Chin ram hmun kip ah ralhrang nih a ralkap thazaang le hriamnam țha țha hna kha a phun kip in tling khitkhet tein le a herhbaumi um ti lo dingin a chap thluamah hna lai. Furpi chungah bawmhnak an in pek thluahmah hna lai i ralkap hi an rak țha tuk ko hme hi tiah anmah lei țang dingin nan thluak an in leh, an in merh hna lai.

Cuticun furpi a hung dih cang lai i hmai thla oktober le november thawk khin cun a za cang an ti țhan lai i kah hram an thawk colh lai. Khi tikah ralhrang phu nih bawmhnak an in pek lio hna i lunglawm tein ralhrang bawmhnak a cohlangmi pastor te nan si ah, khuanu khuapa nan si ah, mipi nan si ah ahohmanh nan him hlei lai lo. Nanmah thahnak ding khuakhan an duh.