Hakha-Thantlang kar ah ni 18 chung kahdohnak a chuak. SAC lei nih an khang dih cang mi Thantlang khua sersiam than ding tiah tlangtar i

Chin ramkulh, Hakha le Thantlang kar ah Chin ralkap phufonh hna le SAC kar ni 18 tluk kahdohnak ah SAC ralkap lei a thimi 50 leng hrawng an si lai, tiah CNF/CNA chimphuannak nawlngeitu Salai Htet Ni nih a chim. SAC ralkap hna cu July thla dongh lei ah Hakha-Thantlang kar Timit lei ah rallam an sial caah CNA le CDF phufonh hna nih an kah hna.

 

“July 30 in nihin tiang Hakha-Thantlang kar ah ni 18 chung kahdohnak a chuak. SAC lei nih an khang dih cang mi Thantlang khua sersiam than ding tiah tlangtar in hmunram kauh an timh” tiah Salai Htat Ni nih a chim. Kahdohnak chung ah Hakha hrambunh SAC ralkap nih hriamngan hmang in nitin in an kah hna i, helecopter nih voi thum tiang hriamthil thazaang a chap, raltuknak vanlawng zong a rak zuang nain, khuacaan ruang ah a si kho men a kir Than, tiah a chimchap.

 

Pu Htet nih cun, “SAC ralkap lei hi ralkap 50 leng hrawng an thi lai tiah ruahdamh a si i, hriam le kuan zeimawzat kan lak, kanmah lei in minung 5 nih hliamhma an tuar, an hliamhma kong ah thinphan ding a um lo,” tiah a chim,A luancia thla chung ah khan Chin ralkap phufonh hna le SAC ralkap hna cu Hakha-Falam kar ah an rak i kap i, atu thla ah cun Hakha-Thantlang kar ah fak ngai in an i kap. “Hmailei kahdohnak cu atu nakin a fak deuh kho” tiah Salai Htet Ni nih cun a chim,

Relchap,Sagaing ramthen, Khin-U peng, Winkyi khuami mino 7 cu SAC ralkap nih an tlaih hna i, an thah hna hnu ah an ruak cu lamkam ah an hlonhtak hna, tiah Winkyi khuami nih media ah an chim,SAC nih an thahmi hna Winkyi khuami mino 7 cu, Kyaw Thu Hein kum 19, Ko Zaw Hein kum 15, Ko Min Ko kum 20, Ko Min Ngi kum 14, Ko Phyo Ngwe Soe kum 19, Ko Nyaing Nyaing kum 22 le Ko Thura Htun kum 21 hna an si.
Mino 7 cu August 14 zinglei ah Winkyi khua in Shwetwe khua lei ah Shwebo motor in riantuan ding in an kal,An kal pah ah Shwebo-Kyaukmyaung lam number 2 sianginn hmai i check gate ah SAC ralkap nih an check hna i an tlaih hna hnu ah, mino 7 cu SAC ralkap training sianginn, number 8 ah an kalpi hna i, an tukvelh hna hna hnu ah an thah hna,Yahthar khua nitlaklei Beauha lam pawng ah an ruak cu an hlonh hna i, an ruak cu nizaan August 15 ah an hmuh hna i, an khua ah an kuat than hna, tiah khuami nih cun an chim.
Credit;The Chin Post