Hakha Peng Kahdohnak Ah SAC Ralkap 30 An Thi

Magwe ramṭhen Gangaw peng in a rak kai mi SAC ralkap hna le Chin ramkulh tualchung hriamtlai phu karlak ah kahdohnak a chuak. Cu kahdohnak ah cun SAC ralkap 30 an thi i, hliam tuar zong an tam, tiah CNA sin in theih a si. April 23, zanlei suimilam 4:30 ah Lungcawi le Lamtuk khua kar ah kahdohnak a chuak i, kaphnih kar kahdohnak cu suimilam 1 tluk a rau, tiah an chim.

Ke in a ra mi SAC ralkap hna cu SAC ralkap nih hramhram nawlngeihnak a lak hnu in Chin ramkulh ah minung thazaang tampi he an rat voihnihnak a si,” tiah CNA in chimphuannak nawlngeitu Salai Htet Ni nih Mizzima ah a chim. Cu kahdohnak ah cun CNA le CDF-Hakha phufonh an i bawm i, mizapi vengtu ralkap lei hliamtuar le a thi mi an um lo, tiah theih a si. Tualchung hriamtlai phu hna le

SAC ralkap kar caan tawi kahdohnak cu nitin ngawt in a chuak nain a ruang tampi ruangah thawngthanhnak kan tuah lo, tiah a chim. February thlachung ah minung thazaang 200 hrawng he Kalaymyo in Hakha lei rallam an sialnak ah CNA le tualchung hriamtlai phufonh nih voi tampi an kahdoh hna i, SAC ralkap 100 tluk cu an thi cang, tiah Salai Htat Ni nih cun a chim.

Rallam a sialtu SAC ralkap hna cu minung thazaang zatceo he lawng Hakha an phan i, Gangaw lei ah an kir ṭhan. Gangaw lam lei ah minung thazaang chap in Hakha lei ah an ra ṭhan, tiah theih a si. Falam in Hakha lei ah a voikhatnak thilri a phor mi SAC ralkap tank motor 2 le SAC ralkap 200 hrawng nih zulh mi motor 27 cu a luancia February 27 in March 7 tiang ah CNA le tualchung hriamtlai phufonh hna nih voi 15 an kah hna, meng 41 tluk aa hlat i suimilam 2 hrawng kalnak khuallam ah SAC ralkap motor ruun cu zarhkhat leng an rau, tiah theih a si.

Kawlin-Wantu Motor Lampi Bomb Puahnak Ah SAC Ralkap 23 An Thi: SAC ralkap minung thazaang 50 hrawng nih Sagaing ramṭhen, Kawlin-Wantu lei ah April 23 ah rallam an sial i tualchung hriamtlai phu hna nih bomb puahhnawh in an doh hna caah SAC ralkap 23 an thi i minung 14 nih hliamhma an tuar, tiah tualchung hriamtlai phufonh nih an thanh. SAC ralkap hna nih nihin April 24 zinglei in Kawlin-Wantu lamkam um mi khua cheukhat hna cu meikhangh in an hrawhpiak hna, tiah tualchung hriamtlai phu chungtel pakhat nih a chim.

“Wantu pengchung khuali hrawng cu SAC ralkap nih nihin April 24 zinglei ah an khanghpiak hna i, Wantu peng Theinlay khua in nu pakhat cu mei nih a kanghchih” tiah Kawlin Revolution -KR nih an thanh.

Kalaymyo Yeshin Kahdohnak Ah SAC Ralkap Ralbawi 3 Tel In Ralkap 20 An Thi: Sagaing ramṭhen Kalaymyo peng chaklei Yeshin (ရေရှင်) khuapawng ah April 22 i a cang mi kahdohnak chung ah SAC ralkap lei ralbawi 3 le pyusawthi hna tel in minung 20 hrawng an thi, tiah PDF Kalay nih April 23 ah an thanh. Myitta (မြစ်သာ) tiva nichuahlei um mi Yeshin (ရေရှင်) khua ah ralkap 250 he rallam hmunthum a sial mi SAC ralkap hna cu PDF-Kalay, CDF-KKG, RKDF le pah-kah-phah (ပကဖ) phufonh nih an kahdoh hna.

Cu kahdohnak chung ah cun tualchung hriamtlai phu in minung pakhat a nunnak a liam. SAC ralkap hriamngan kahnak in Yeshin (ရေရှင်) khua inn 9 an kang, tiah theih a si. April 23 kahdohnak a chuahnak hmunhma cu PDF-Kalay nih hmunhma thianhhliamhnak an tuah lio ah SAC ralkap hriamthil 5.56 kuan 224, AP 95 Ozi kuan(အူဇီ) 61, Ozi (အူဇီ) kuanbawm 2, bomb lung 3, MA kuanbawm 4, phone pakhat kan laak, tiah an langhter chih. (Mai Anna Par TCP Journalist) Crd – TCP

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum