Duibai le Oman ah a um mi chin mi pali an zuar hna timi kong he pehtlai in ram kip a um mi Chinmi hna zong lungrethei le awlokchong in

Dubai le Oman ram ah Chin mi nu 4 an zuar hna ti mi kong he pehtlai in Nu Tial Hlei Cuai (Dauchim khuami) chungkhar hna sinin fianternak le an Agent sin nawlnak,

 

Duibai le Oman ah a um mi chin mi pali an zuar hna timi kong he pehtlai in ram kip a um mi Chinmi hna zong lungrethei le awlokchong in nan rak um cio hna. hi kong he pehtlaiin Nu Tial Hlei Cuai(Dauchim)zong hi an lak ah aa tel ve mi a si caah, a chungkhar nih a thawngpang kan theih in thawng fiang hlathlainak kan ngei ve colh i, kan fa nu Tial Hlei Cuai he zong tha tein chawnhbiaknak kan ngaih tikah. Pathian kelvennak thawng in a him ko i, a um nak inn ah rian tha tein a tuan ko ti kan theih.

 

kan fa nu hi kum khua lei in ngakchia a si caah miphun dang sinah thutdir le biachim holhrel a thiam lo caah le, riantuan aa harh deuh mi a si caah rian tlawmpal hnek hi aa harh deuh ca tu ah a si. A umnak inn ngeitu zong nih tha tein an zoh khenh ko i a dam lo caan zongah felfai tein zoh khenh a rak si ko. Aa manh caan ah cun phone zong in chawnhbiaknak tha tein kan ngei kho ko.

Hi ruangah hin Chin mi nu (4) an zuar hna timi thawngpang a leng mi ah hin kan fanu hi aa tel ve caah hi thawng hi a chungkhar nih vawlei cung hmun kip um mi Chinmi hna sinah thawng fiang thanh kan hun duh mi a si. Miphun hawi nan dihlak cungah lunglawmhnak kan ngei, bawmhchanh dingah a kan pehtlaitu nan dihlak cungah kan i lawm. Kan fanu cu zuar mi a si lo i, khika lei riantuan dingah a kal mi a si bantuk in a umnak inn ah rian tha tein a tuan ko.

A umnak inn ngeitu hna he zong rem tein khua an sati ko.Hi thawngpang a leng mi ruangah a Agent te zong nawl kan duh hna, hi thawngpang nih an min le an riantuannak a hnorsuan lo ding hi kan fa nu Tial Hlei Cuai le a chungkhar nih kan duh mi a si. Hi thawngpang ruangah a lungrethei i, a lam kip in a kan bawmtu nan dih lak cung ah kan i lawm.

Tial Hlei Cuai Chungkhar(Biakilh: Hi kong he pehtlai in The Hakha Post nih hlathlainak kan ngei kho lo. Chungkhar lei nih thanh an kan fial mi a si caah kan thanhpiak mi hna a si.

 

Mizoram ramkulh, Lunglei district Thaizawl ralzam camp ah a ummi Chin ralzam siangngakchia hna cu kumcheu caminpuai tuahnak an ngei tiah, theih a si.

Thaizawl ralzam camp ah a ummi ngakchia hna cu khua chungah sianginn kai awk a that lo caah Mother of Chin Relief Committee (MCRC) nih cachimtu sayamah pahnih an hlan piak hna i camp biakinn chungah ca cawnnak an tuah.

Thaizawl ralzam camp ah a ummi hna hi Matupi peng a zammi an si i minung 400 renglo an si, sianginn kaimi siangngakchia hi minung 100 reng an um tiah, theih a si.

 

Thaizawl ralzam camp bantukin Mizoram pumpi ah ralzam camp tampi a um ve i a cheukhat hmun ahcun camp ah sianginn kai loin Mizoram cozah sianginn ah an kai tiah theih a si.