CNF Biachimnak Nawl A Ngeitu Salai Htet Ni Biahalnak

“SAC nih sawmnak ruangah kan lung a buai ding a si lo, kan dirhmun a feh hau tiah chim ka duh. The Chinland Post | 2022 May 3 – SAC hruaitu General Min Aung Hlaing nih tlangcung hriamtlai phu he tonnak ngeiding in April 22 a biachimnak ah sawmnak a tuah chih. Cu kong he pehtlai in Chin National Front (CNF) a dirhmun zeidah a lawh timi he pehtlai in CNF biachimnak nawl a ngeitu Salai Htet Ni biahalnak a si.

CNF biachimnak nawl a ngeitu Salai Htet Ni le Khonumthung Burmese biaruahnak The Chinland Post nih Laica in leh chinmi a si. Q – Hramhram in uknak a laktu General Min Aung Hliang nih tlangcung hriamtlai phu pawl he tonnak ngeiding in an sawmnak hna cungah CNF dirhmun zeidah a si?

A – A hmasa bik ah, Myanmar ram buainak hi SAC le tlangcung hriamtlai phu hna karlak lawngah a cangmi buainak a si lo. SAC le Ethnic Armed Organizations (EAOs) lawng in tawlrel khawhmi buainak a si ti lo. SAC nih a thokmi buainak hi mipi le SAC karlak buainak a si cang. Mipi zapi kan i telmi ‘Mipi’ le SAC karlak ah a cangmi a si. CNF nih sawmhnak cungah zeibantuk biaruahnak hmanh kan tuah rih lo.

Q – General Min Aung Hliang nih zeibantuk ruahchannak in dah tlangcung hriamtlai phu pawl hi an sawm hna tiah na ruah? A – Ramdang lei hmuhnak ah ramkhel lei ti khawh deuh nak hmuh a duh lawng si loin 2023 thimnak caah mipi hriamtlai phu pawl hrawh dih in daihnak a len khawhnak hnga tiah aa ruahchanmi zong a si ko lai.

Q – General Min Aung Hliang nih tlangcung hriamtlai phu pawl keimah pumpak in ka ton hna lai, cun State Administration Council chungtel pawl zong he tonnak a um lai tiah a rak chim. Zeibantuk a phichuak dah na ruahchan? A – A mah pumpak in ton, State Administration Council phu pawl he ton zong aa hlei lo. A khat dihmi a si ko. Kan duhmi kan ngah kho lai maw ti kan chim a si ahcun, tonnak a um hlan ah ram pumpi khoika hmunhma hmanh hrelh loin kahdaihnak um seh tiah kan hal ahcun SAC nih a cohlang lai maw? Cucaah ruahchanawk zeihmanh a um lo.

Q – Tonnak a kai duhmi tlangcung hriamtlai phu hruaitu chung in minung pahnih cu May 9 ah a hnubik thawngthanhding tiah SAC hruaitu nih a chim. CNF nih tah tonnak kaiding in min cazin pek nan i tim maw? A – Hi kong he pehtlai in biaruahnak kan tuah lo. Kan tuah rih lo.

Q – A dangdang chim chap na duhmi a um maw? A – A tubantuk sawmnak kong he pehtlai in tlangcung hriamtlai phu si hna seh, mipi hriamtlai phu si hna seh, hramhram uknak hrawh cikcek ding cu kan i tinhmi a si ko caah mipi le a dangdang phu hna nih lungawṭawm ding zeihmanh a um lo. Kan zulhmi lam cungin i ṭhencheu lo le lungrual tein kan kalṭi a hau, SAC sawmnak ruangah kan lung a buaiding a si lo, kan dirhmun a feh hau tiah chim ka duh Crd – TCLP

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum