Chinmi Nunnak Thisen Man Tampi In Rakhine Ram Ah Confederation A serchuak Cuahmah mi AA le Twan Mra Naing Ansiko Lo Maw?

Kawlte nih uk ballo mi, Rakhine ram le Mon ram cu ahlan kan in, pupa thawk in, SPH uknak in aa uk cangmi ram ansi. Kawl hlan ah Budhism abiak cang mi ansi. Kawl SPH nih an ram an chut hna I an biaknak Budhism zong an fir piak chih hna. Mon Khama tampi cu Cambodia ah an zam I Ram an dirh ṭhan.

ASEAN Hoatu Cambodia PM Mr. Hunsen khi Mon Khama miphun asi. Amah nih MAH le SAC he aa kawmh caah, Mon Party le miphun nih Paucan Dohthlennak ah Rallokap he an I kawp ve. Rakhine ram tu cu Ram dirh an duh ko nain Nihin tiang an hlawhtlin ve lo. AA le Twan Mra Naing chan lawng ah an Chunmang tlin hram aa thawk ve. Mirang nih kawlram an lak ah khan Kawlnih an uk cang hna. Rakhine ram sining in lak loin Kawlram pennak in alak mi asi caah, Panglong ah Rakhine le Mon an I tello hi asi.

Mirang chan ah Shanram, Karen le Karenni ram cu mah tein aa uk mi ram ansi. A zalonmi ram an si. Uk Sang nih Keimah nih ka aiawh hna tiah a ti caah, Panglong ah Chin, Kachin, Shan, Kawl miphun (4) lawng nih biakam Senthuhnak antuah hi asi.

AA le Rakhine mipi nih Paucan Dohthlennak ah SAC le MAH he I kawmh bantuk in an um hi aruang aum. AA le Rakhine cihmih awk ah Amay Suu nih senthuh in nawl a pek hna caah asi lai. AA raldohnak ah athih mi Rallokap cu minṭhatnak medal le laksawng pek tu Amay Suu asi. AA he Raldoh lio ah Amay Suu nih Kapa Ralkapbu tiah Achimh hi a voi tam tuk ve.

Makphek / Thakbere cu ahring ah siseh, asen ah siseh, athak ning a zawr hlei lo, athak zungzal ko, Tlangcung mi caah NLD le USDP / Rallokap cu an I khat ko, bambawk le mantak an si ko tiah Tuanphung thar sertu Rakhine miphun an si. PDF cu kawlte ralkapbu an si caah, AA le Rakhine doh awk ah an hmang ṭhan khawh tiah AA nih fek tein an zumh caah,

NUG he biatak tein kawp in Ramkhel an kal pi lo. NUG le SAC Rallokap nih KAPU tiah kawh auh ding kha aa zuam I, aatimh zungzal. An hlawh tlin ngai ngai fawn. Kawlram GZ nih Hriam Dohthlennak an thawk ri in AA nih SAC he PEACE a tuah colh. CDM tuah lo ding Rakhine mipi a fawrh hna. MAH le SAC bawmhnak in Rakhine ram ah Siang Inn an onh dih.

Cozah rianṭuan vialte a ngawl ter hna lo. Athar tu in an sawk ter hna. Siang Inn ah Rakhine ca le Rakhine nunphung cawn awk Rallokap sin ah nawl an hal. Thantar cu Rakhine thantar an tar nain, arau hlan ah Kawlram thantar tu in an thlen ter hna. Siang Inn ah Rakhine ram hla an sa. MAH le Rallokap bawmhnak in Rakhine ram ah Rakhine phungning in Biaceih zung an onh khawh. Rakhine MP, Rakhine Party, Rakhine mifim thiam vialte hna hmang in AA nih ram an uk hruai.

Thlahlawh zong SAC nih an pek hna. AA nih Rakhine Police an tuah I rule of law um khawh ding in aa zuam. AA Ralkap thazang tampi in a chap khawh, Hriamnam he a minung he. Rakhine ram um CHIN miphun zong AA ah lut ding in ṭhihphai an si. Tampi zong an lut ter fawn. Rakhine ram ah CHIN miphun hi 250000 leng an um ti asi. Rakhine Khualipi hlun Myo U le Ann velchum ah.

CHIN miphun hi an um deuh. Laitu le Lautu miphun hi atam lei aum mi ansi. Laitu miphun cu Zophei he aanaih bik mi chin miphun an si. Ann Myone ah, Lautu miphun khua hi 42 aum ti asi. AA ah aum mi Chin Ralkap hna hi Laitu le Lautu miphun hi atam bik ansi. Mara, Mindat, nih AA sin ah tindan an kai, Tindan pek tu hna hi Laitu (Zophei pa) le Lautu pa hi an si hna.

Chin le Chin tidan I pek asi tiah cohlan khawh asi lai maw? Dai miphun le Mro miphun hi AA ah hranhram in an lut ter mi atam lei pawl an si ve. AA thawk ka ah, minung 25 te lawng an si. AA hi Rakhine ram le miphun umnak ah ral an doh ballo. Chinram Paletwa tu ah ral andoh. Mipi athih mi le harsatnak atuar mi tam deuh cu CHIN mi lawng te kan si. Rakhine ram ah.

AA nih ral andoh ah, chin mi umnak lawng ah asi. Rakhine mipi umnak ahcun Raldoh an hrial. Chinram um hlah uh kan ti hna ah umnak kan ngeih lo caah asi, Paletwa hi kan duh mi asi lo tiah an I ti ter. Dr. Aye Maung telin, AA Politicians kip nih Paletwa hi an duh dih. Chin ram ri um mi, Rakhine tar vialte nih Paletwa cu Rakhine ram an ti dih. Chin mi nih.

Kan ta sinak Prove tuah nak kan tuah khawh rih lo caah asi men lai. Kan ram sinak kong chim ve ve tikah Rakhine tar hna nih database le evident base he an chimh rel khawh deuh. Cucaah Twan Mra Naing nih Paletwa hi aduh tuk palia, a depde I a chimh cakhong mi khi asi ko. CNA, CDF hi alam kip in kan ṭhawn ter lo ahcun, AA hi kan tei khawh ti hna lailo. Paletwa zong kan sung cikcek te lai.

SAC bawmhnak hlei in Tuluk cozah sin in bawmhnak tampi ahmuh mi AA asi. Hriamnam le phaisa he bak ti in Tuluk nih AA cu relcawk lo a bawmh cang. Rakhine hlawnthil le gas aduh caah India zong nih AA cu tampi in an bawmh rih hna. Cu ruang ah AA nih Rakhine ram ah Federal nakin asang deuh mi Confederation cu hlawhtlin ngai in ahniksak khawh mi hi asi.

Tutan Paucan Dohthlennak ah Kawlram, Tuluk le India tiang nih ṭihzah mi AA an si nak kawl tik ah, CHIN MI Nunnak le thisen man tampi ruangah asi hi hmuh khawh asi. Kan NLD chan ah AA le Kawlram an I doh tikah, Chinram lawng ah I doh asi. Chin miphun cu AA ah hramhram in lut ter an si ve. Ral ruang ah athih aloh mi, a harsa mi, Ralzam mi, innlo khuaram chuak tak mi, tbk vilate hi chin mi lawng te kan si.

Nai hrawng AA le Rallokap an I kapnak hmun hi Laitu le Dai miphun umnak chin ram asi. Tandaung velchum ah asi. Rakhine ram ah asi ahcun Chin mi umnak deuh ah asi. Rohingya umnak Maungdaw zong ah an I doh pah tawn ve. Rakhine miphun umnak ah Raldoh lo ding hi AA planning cu asi. Chin ram ah AA nih ral an thawh hi Paletwa anduh mi lawng in aza lo.

VP Henry nih AA cihmih awk ah Meeting akai ve I, sen a thuh ve caah, Chin mi cung ah AA alung afak hrinhran. EAOs dang cu Kum 70 an upa cang. CNF/ CNA kum 35 upa mi asi cang. AA kum hi kum 10 cung akai rih lai lo. Hi tlukin an ṭhawn I an thawngṭha mi hi Chin mi nih nunnak le thisen tampi kan pek caah asi tihi hngalh a herh ko. AA cu a Chunmang an hlawhtlin caah.

MAH le PEACE ah I tel le tello nih Lairel in, khenkhap in, a uk khawh ti hna. PEACE TALK nakin acung nung deuh mi le sining sang deuh ah an um cang. PEACE anti kha cu Rallokap kha a dehcawh hna I asi ko lo ma. AA Ralkap cu Confederation ram derh khawh tiang in Ralkap in siseh, mipi nunnak tampi in siseh, harsat nak tampi intuar nak in siseh, a tuah piak tu chin mi kan si caah,

Paucan Dohthlennak ah CHIN mi nih MAH le SAC kan tei lailo timi hi zumh khawh asi hnga maw? Pawpi le Chiandeih nih an Ṭhawnnak I hngalh loin, Naatum le Ram Ui an ṭih Bantukin kan si awk asi lo. Chin mi vialte nih kan ṭhawn nak hi I hngalh cang usih. Kanmah lawng in Ralhrang Rallokap atei khawh tu kan si tihi hngalh camcin ko usih. Alamkpi tu in, kan zeizong za he.

CNF/CDF/CNDF hi, mah le khap tawk tein, mah le pahrang cio in, zuang hnawh in bawmhchan zungzal ko usih, I erm lo nak le pumkhat si khawh lonak vialte kal tak cang usih, ZRA ke MDF kaltak in CDF he I fonh cang usih, lungkhat thinkhat, aw khat thlah cang hna usih, Pengtlang thlarau le Pengtlang revival thlauh in thih ter cang hna usih, Zo le Lai um ti hlah sehlaw,

CHIN tu ah pumkhat si zuam cang hna usih, Ahohmanh nih hlen khawh in, ṭhen khawh lo mi si cang hna usih, kan karlak I ti zut ti hlahseh, awnkua pelte hmanh pemh ti hlahseh, firkhut ti hlah usih, fir le hlenthuai ziaza thih cangseh, kan ṭial thih ter dih cang hna usih, ral kan tei hlan tiang tiah sawm buin,…….Credit – Zingtincuai Cinzah