Chin Ralkap Kah An Tonnak Yinmabin Kahdohnak Kong Thawng Thar(Updated) mah kawng thawngpang dalan raung i acang mi hi

Sagaing ramthen, Yinmabin peng, Yinpaungtai khua cu dalan thawngpeknak ruang ah SAC ralkap nih van lei kahdohnak a tuah i, thawngpetu cu theih a si cang, tiah Yinmabin pengkomh chimphuannak nawlngeitu Bu Myait Ko nih a chim.Chin ralkap hna nih hriamthil an phorh ah, an i tonnak hmun Yinpaungtai khua le Pahtuta khua telh in khua 3 ah SAC ralkap nih nizaan August 11, zaanlei suimilam 3:00 hrawng ah van lei in kahdohnak a tuah, tiah Kawl media nih an langhter.

 

“Mi-35 pahnih le Mi-17 pakhat tiin helicopter 3 hmang in Yinpaungtai khua le Pahtuta khua telh in khua 3 cu hmunkip ah an kah. Cu hnu ah Mi17 nih minung thazaang a chap i, zaanlei suimilam 3:00 hrawng ah Helicopter pahnih nih minung thazaang a chap than. Zaanlei suimilam 5:20 hrawng ah Mi helicopter pakhat le Mi35 pakhat nih kahdohnak a tuah than,” tiah helicopter in kahdohnak a tuahnak kong cu Bu Myait Ko nih a chim.

 

Hriamthil phortu hna an i tonnak ding hmunhma kong, Monywa nah-mah-khah sin ah thawng an peknak audio file cu khuami nih a hlankan in an theih caah, motor 2 in i tonnak ding hmun cu thialnak an tuah than nain, SAC ralkap lei nih an i thialnak hmun lei tiang vanlei in an kahdoh hna, tiah an tial,”Hi thilcang kong ah a caan za rih lo kan ti caah thawng thanhnak kan tuah rih lo, Monywa nah-mah-khah sin ah thawng an peknak audio file tiang kan sin ah a phan,” tiah Chindwin tangrual phufonh committee tuanvo ngeitu le Yinmabin pengkomh tuanvo ngetu Bu Myait Ko nih Than Lwin Khet ah a chim.

 

Cu thilcang kong he pehtlai in thawngpetu phu chungtel dalan pakhat cu tualchung hriamtlai phu nih an tlaih i, bia halnak kan tuah tiah Yinmabin tualchung hriamtlai phu chungtel pakhat nih a chim”Hriamthil a phortu Chin ralkap chungtel 80 chung ah minung 76 cu hmun pakhat ah an i tong dih cang, minung 4 cu kawl cuahmah lio an si,” tiah Bu Myait Ko nih cun a chim. Chin ralkap hna chung ah CDF-Mindat in ralkap 20 an i tel i, cu chung ah minung 2 an tlau, tiah an langhter.

 

 

Yinpaungtai khua luhhnawh in kahdoh an ton ruang ah tualchung hriamtlai phu minung 7 an nunnak a liam i, hriamthil zeimawzat kan lakkhawh tiah SAC ralkap media hna nih thawngthanhnak an tuah nain, nunnak liammi kong ah tualchung hriamtlai phu lei nih fehternak an tuahmi a um rih lo,Nihin August 12 ah Yinpaungtaikhua cu SAC ralkap nih Helicopter in minung thazaang a chap, zaanlei suimilam 4:00 luan hnu ah khuachung an khangh, tiah tualchung mi nih an chim. Atu tiang ah Yinpaungtai khua ah cun SAC ralkap 150 hrawng umhmun an khuar i, nihin August 12 zaanlei hnu tiang ah van lei in kahdohnak an tuah rih, tiah theih a si.(Than Lwin Khet).
Credit;The Chin Post