CDM Tuahtu SAC Ralkap Sing 60 An Pek

Karen ramkulh , KNU brigade 6 hmunhma, Myawady pengkomh Laykaegaw hmunhma KNLA/Cobra sin ah SAC ralkap 2 cu April 28 ah hriamthil he CDM an tuah tiah theih a si. SAC ralkap sinak kaltak in KNLA/Cobra sin ah CDM a tuahtu SAC ralkap 2 cu tat-mah 44 kuttang um Tathung (သထုံ) khah-mah-yah- 1 in ralkap Mawng Zaw le ralkap Kyaw Tu Soe an si. Ralkap Kyaw Tu Soe nih MA-4 meithal 1, kuanbawm 4, 40mm kuan 8, 5.56 kuan 100 aa put khawh caah Kyaw Tu Soe cu 60 mmk pek a si tiah Cobra nih an thanh.

“Hriamthil he CDM a tuahtu Kyaw Tu Soe cu NUG cozah nih Myanmar kyats sing 60 laksawng an pek, Hriamthil aa ken lo mi ralkap pakhat cu Cobra ralbawi bu-gyi Da Baw nih Thailand phaisa in bat 10,000 laksawng a pek ve, Mizapi sin ah i fonh in CDM tuah duhmi ralkap hna cu Cobra tualchung hriamtlai phu hna nih lunglawm tein don nan si ko,

CDM a tuahmi hna le chungkhar hna an himnak ding tiang tuanvo kan lak ko” tiah Cobra in tuanvo ngeitu Ko Myo Turah Ko Ko nih a chim. SAC ralkap chuaktak in CDM a tuahmi ralkap Cobra sin aa fonhmi nihin tiang ah 6 an si cang tiah an cathanh ah an langhter chih. SAC ralkap nih hramhram nawlngeihnak an lak 2021, February 1 in kumkhat leng tiang chungah ralkap le palik 10,000 leng nih CDM an tuahcang tiah Pyituh Yin Khun(ပြည်သူ့ရင်ခွင်) nih an thanh.  Crd – TCP

Rel chap –  Kum 2 timi Zuamcawhnak (Kawl zumh ning) Ne Win Lucky No. 9 a si i Than Shwe Lucky Number cu 11. Kawl ralkap nih a tlang piin a tu in kum 2 ah thimnak ka tuah lai a ti. Thimnak tuah khawhnak ding caah Electoral system thimnak phung zong remh a timtuah cuahmah. NUG zong nih Bond a zuar i kumhnih ca long in a zuar. Kumhnih ahcun atu lio dohnak hi kan tei lai an ti ti khawh a si.

A caan a thawk ka long a si rih. A tlai tuk ti a um bak lo hih unau. Atu nai te long ah an zuar caah. NUG nih a thawkka long a si tinak a si. Kawl zumh ning. Kawl miphun hi nika thlapa arfi (astrology) le number (numerology) a zum ngaimi miphun an si. Atu tiang an zumh rih. Kawl hruaitu poh nih hmailei kong a chimtu (soothsayers) hna le thil a cang khomi tiah ruahmi thin damternak kha bia an ruah an kawl ton hna. Myanmar ram zalonnak zong arfi nika thlapa zohthiam hna nih.

January 4, 1948, zingka suimilam 4 le minute 20 ah nan kan pek ah a tha lai an rak ti hna. A voikhatnak PM U Nu zong nih 1961 kum ah thetseh kawl biaknak pagoas 60000 a rak ser. Daihan a um khawhnak caah. Number pakua 9 zoh chih in a tu bantuk in pagodas tampi a rak saknak a si an ti. Ne Win zong astrologers le numerologiests hna kha 1962 uknak a lak hnu ah ruahnak a rak hal ton lengmang ve hna.

Cucaah 1970 kum ah kawlram kha fak piin thlennak a rak tuah. Kawlram hi kehlei ah a kal tuk. Orhlei ah kal a hau ti a rak si. 1987 kum ah myanmar kyat 45 le 90 zong a rak chuah. Lucky Number a rak ti. Atu tiang a thi kho rih lomi Than Shwe zong a u le nawl a rak cawn lengmang ve. Naypyitaw khuapi na ser a hau an rak ti. A rak ser. 2005 bak ah na ser a hau an ti ning in a rak ser.

Astrologers ruahnak pek ning tein a sermi a si. Ne Win Lucky number cu 9 a si i Than Shwe lucky Number cu 11 a si. Kan nih Zumtu Khrihfami kan caah cun ni vialte hi nisunglawi an si dih. Cu ni a thiang deuh, cu ni a thur eh, cu ni long ah ti bantuk cu Kawl zumhnak nih kan thluak a kan tawl pah cangmi sidawh kan si ko rua. Cu vial. General Aung San hi a thluak kal ning hrimhrim hi a rak i dang ko rua.

Tlangcung mi le kawlrawn mi minsak he aa lo lem lo. A ruang cu theih a si ve lo. Zeitindah a si? Amah a min Aungsan kha min hmai ah a sak a benh hmasa lehlam dih hna. Tahchunhnak – Aung San Oo, Aungsan Suu Kyi tbt . Midang thluak le min pek he i lo sehlaw Suu Kyi Aungsan ti a si hnga cu mu… hehe.

Tlangcung le Kawlran poh cu hringtu an pa le an min kha a hnu bik ah an chiah dih. – Tahchunhnak – Hringtu pa kha Khauh Khauh sisehlaw fanu siseh fapa siseh – min ah Ms Liang Liang Khauh Khauh ti phun in an i sak dih. Aung San hi a fa le min umtu ning zoh ah phundang pi bak a si hrimhrim ko. Crd – Thawng Za Pum