CDM Tuahtu Ralkap Leirawinak Ruangah Y-PDF Sakhan Cu SAC Ralkap Nih An luhhnawh,

CDM Tuahtu Ralkap Leirawinak Ruangah Y-PDF Sakhan Cu SAC Ralkap Nih An luhhnawh I, Sing 200 tluk Thilri An Sung! Mandalay ramthen, Yamethin peng Y-PDF cu CDM tuahtu pakhat nih an kan leirawi ruangah caan karlak kan hmanmi sakhan cu SAC ralkap nih kan luhhnawh i, Kyats sing 200 tluk thilri kan sung, tiah PDF sakhan in tuanvo ngeitu Lyin Yung nih a chim.

 

July 30, zaanlei ahkhan riantuan ding tuanvo i thiah in rian thlennawnnak an ngeih lio ah, CDM ralkap Kaung Sat Lwin nih an umnak hmun cu langhter in a zaamtak hna i, SAC ralkap pawl cu lam a hmuhsak hna, tiah theih a si.SAC ralkap pawl an phak ah cun tualchung hriamtlai phu hna cu minung an i thencheu lio a si caah minung thazaang le hriam thazaang an i thlau tuk i, PDF nih sakhan cu an kaltak, tiah theih a si. Cu sakhan an zaamtak mi thilri cu Kyats sing 200 man hrawng a si, tiah an chim.

 

 

 


Relchap, Sagaing Ramthen Chung Kahdohnak Ah SAC Ralkap 35 An Thi: Nihin August 4 ah Sagaing ramthen, Ayardaw peng le Myinmu peng aa tonnak Khuatkhun khua pawng ah rallam a sialtu SAC ralkap 64 cu tualchung hriamtlai phu nih an kahdoh hna caah SAC ralkap 15 an thi, tiah Myinchain Zero pah-kah-phah hruaitu Ko That Kyi nih a chim.

 

Sagaing ramthen chung thiam, Tazepeng Byaitky khua ah umhmun a khuarmi SAC ralkap le pyusawhti phufonh cu August 4 zinglei suimilam 1:00 hrawng ah tualchung hriamtlai phufonh nih an kahdoh hna caah SAC ralkap 10 an thi, tiah tualchung hriamtlai phu nih an thanh.“SAC ralkap le pyusawhti hna cu umhmun an khuarnak hmun in hmundang ah an zaam. A thimi ruak cu Leeng 2 in an thiar hna i, 10 nak tlawmlo an thi lai,” tiah khuami nih an chim.

 

SAC ralkap le pyusawhti phufonh nih umhmun an khuarnak sakhan cu Taze PDF battalion 6, battalion 8, battalion 10, battalion 16, KPK, TSR, Taze Tiger, PRLF, PLA, pah-kah-phah le pah-lah-phah phufonh nih an doh hna. SAC ralkap nih an kaltakmi 5.56 kuan 100 le bomb lung khat an lak, tiah theih a si.SAC ralkap nih umhmun an khuarnak Byaitkyi khuami hna cu SAC ralkap le pyusawhti an kir than lai an phan ruangah khuami dihlak in an zaam dih, tiah theih a si.

 

Aung San Kwin Thilkuatnak Gate Cu SAC Ralkap Nih Caan Rikhiah Um Lo In An Kharter Hna!: Yangon, Aung San Kwinthilkuatnak gate pawl cu SAC ralkap nih nihin August 4 in, caan rikhiah um lo in an kharter hna, tiah gate riantuantu hna sin in theih a si. Aung San Kwin gate khar a si caah thil phak caan ah nan thil a phak lo ah cun, kan theithiam u, tiah gate riantuantu cheukhat nih social media in theihternak le nawlnak ca an tar.

 

A luancia June thla chung zong ah Yangon, Aung San Kwin gate cu ni 3 chung SAC ralkap nih an rak kharter bal cang hna. Tu tan ah cun zeitik ah dah gate hon than a si lai theih a si rih lo, tiah gate riantuantu cheukhat nih an chim. Yangon Aung San Kwin gate cu pengkulh hmunkip ah eiding le thilri tampi kuatnak ah hmanmi a si.